Hellooooooooooooooooooo

any body here

????

heeeey

this is Dina

i'm still here

still alife

do you forget me

i hope no

i will come back

very soon

i have alot of news to talk about

so

wait for me

Dina

NEVER MISS A MOMENT

وعد الحر..دين عليه

اكيد وعدت حد قبل كده؟ واكيد يا خلفت الوعد ده او يا اما وفيت بيه؟
بس وانت بتوعد عارف انه لازم توفى بالوعد ولا هى كلمة عندك وخلاص؟
زى اى كلمة, زى مثلا كلمة حاضر (وحاضر بتريح)؟
طبعا انت مش حالة شاذة او مش طبيعي لو ماوفيتش بالوعد او لو كانت كلمة اوعدك كلمة عادية عندك ممكن تنفذها او متنفذهاش لان ده الطبيعي يعنى, مفيش اليومين دول حد قد الكلمة الا قليلين جدا, وبصراحة مفييش حد عندنا هنا فى مصر بيعترف بالكلمة دى.
يعنى ممكن يحلفلك بأيمانات المسلمين وبأى حاجة ممكن تتخيلها لكن اوعدك دى كلمة عادية, ممكن اه يقول وحياة خضرا الشريفة, وحياتك عندى..ويقعد بقى يحلفلك من هنا لتلت ايام قدام انه مش هايخلف كلمته والله اعلم لو نفذها ولا لاء.
تعالى بقى مثلا فى الافلام الاجنبية هناك عندهم كلمة

I Promise you

دى كلمة شرف ومش محتاج انه يحلف ولا يقول نص كلمة تانية بعدها مثلا البطل يقول للبطلة

I promise i will be back

خلاص تلاقى بقى طول الفيلم البطل يحصله اللى يحصله بس برضه هايرجعلها وهى ولا فى بالها , عارفة وعندها يقين انه هايرجع ولا مثلا الدنيا بتتقلب فى الفيلم وخلاص الاتنين هايموتوا, وهو بس يقولها

Every thing is gonna be aokay, I promise

وهى تهز راسها بانها مصدقاه, وفعلا بيبقي

Every thing is okay

يا سلااااااام تحس ان خلاص بقى مفيش بعد كده, مش قالها

I promise

خلاص انسى يابنى ما لازم الفيلم يتقلب لصالحهم, دى كلمة شرف مش اى كلام, ايه يا جماعة الناس دى؟ للدرجة دى الكلمة عندهم ليها الف حساب وليها كل القدر ده من الالتزام والاحترام.. اصل هما مش هايجيبوا قيمة عندهم وهما مش بيعملوها فى حياتهم العادية..وحتى لو ده مش بيحصل فى حياتهم , كون انها تبقى فكرة وبيحاولوا ياكدوها فى افلامهم فا ده ذكاء منهم زى بالظبط بعد انتهاء اى حوار بين اتنين بيحبوا بعض يقولها فى اخر المكالمة

I love you

زى ما يكون بياكدلها حبه فى كل لحظة وكل دقيقة..هى دكتورة ومسافرة فى وفد لعلاج الجرحى فى باكستان على حدود كشمير وهو بيشتغل رجل اطفاء فى جنوب كاليفورنيا وكل اتصالتهم ببعض بتنتهى بنفس الكلمة.. او لو كانوا لسه مع بعض فى المطعم وهى روحت واتصل بيها يقولها نفس الكلمة فى اخر المكالمة..سيان كانوا بيعد عن بعض او قريبين..لازم الكلمة دى بينهم بدل الوداع, فا دى كمان قيمة عجبتنى اوى فيهم
نرجع لموضوعنا ان الوعد عندهم ليه مكانة خاصة جدا واحترام والتزام بيه جامد, زى فيلم تايتانيك فى المشهد اللى السفينة خلاص غرقت ومفروض البطل بيموت فى مياه المحيط وطبعا كانت تلج والبطلة على خشبة من حطام السفينة قالها

Promise me that you'll never give up no matter how hopeless

وردت عليه البطلة

I promise

خلاص خلصت..مش وعدته يبقى هاتعيش

ده طبعا بغض النظر عن القضاء وانها لازم تموت ولو مكتوب لها تموت) بس الفكرة هنا ان لو فيه احتمال 1% انها تعيش وده هايعتمد ان يكون جواها حافز قوى يخليها تمتمسك بالحياة فاالحافز ده هى كلمة وعد قالتها لحبيبها قبل ما يموت..لا قالها خلى بالك من نفسك ولا من

العيال ولا احلفى بسرعة كده انك هاتعيشي او لازم تحلفة بحياة والدى والكلام الهايل بتاعنا ده

انا مش بتكلم هنا على الحلفان خااااااااااااالص.. الفكرة ببساطة ان ازاى كلمة زى دى هى مفتاح للامان والثقة واليقين وان قدامها ممكن تتغير مصير حاجات كتير وممكن حياة انسان تبقى واقفة على كلمة وعد قالها.
الكلام ده فكرنى برضه بمشهد فى فيلم افريكانو (عشان الناس ماتقولش انى متحيزة للافلام الاجنبية) لما احمد السقا كان فى اخر مشهد من الفيلم واقف مع منى زكى وهجم الاسد عليه وجيه حسن حسنى ضرب الاسد بالرصاص, ومنى زكى افتكرته مات فبتصرخ بتقوله" بدر؟؟؟؟؟؟؟" راح قايم وقالها" مش قولتلك مية مرة ماتخافيش"...ايه ده !!!؟؟ قالها كلمة لازم تثق فيها " ماتخافيش" اداها الامان فى كلمة, كلمة واحدة, بجد عجبنى اوى المشهد ده
ومش عارفة ايه علاقة المشهد بالموضوع اللى بتكلم فيه بس عامة هو فيه علاقة ولو من بعيد
هى ايه العلاقة..حاول انت بقى تطلعها نيهاااااااااااا
على المستوى الشخصى, فا انا بحترم الوعد جداا بمعنى اصح بحترم الكلمة اللى بقولها وبحاول قدر الامكان انى مخلفش وعد قولته وانا بعتبر انى ليا وعد وعليا وعد: وعد ليا للانسان اللى هايبقى شريكى فى الحياة انا متاكدة انه وعدنى

I promise i will come in my time

والوعد اللى عليا ليه

And I promise i will wait

حد ظريف هايقولى ايه ده هو انتوا كنتوا فى فيلم اجنبى هاقوله خليك فى حالك

ومش عارفة البوست قلب عربى على انجليزى كده ليه يمكن عشان بقالى كام يوم بتفرج على ام بى سى اكشن كتيير اليومين دول..يالا مش مشكلة

وبمناسبة الكلام ده..احب احط اغنية برضه ملهاش اى علاقة بالموضوع

:D

I promise you,From the bottom of my heart

I will love you till death do us part

I promise you as a lover and a friend

I will love you like I never love again

With everything I am

Get this widget Track details eSnips Social DNA

شغل فوتوشوب عالي

لعشاق الجرافيك ومحترفى الفوتوشوب
او بتحب الفوتوشوب وليك فيه على خفيف زى حالاتى
او لو مالكش فيه خالص
احب اعقدكم بالفديو ده
الفديو تصميم واحد اسمه
Nicko Di Mattia
بيرسم شخصية لاحد ابطال مسلسل
Lost
اللى كان بيتعرض على قناة
mbc action
اسيبكم بقى مع الفديو
بس الاول قبل ما تحمل الفديو حاول ترجع بالكرسى لورا شوية
واطفى النور وركز مع الموسيقى و الرسم
وعيش يا معلم

انا وصديقى الجديد

انا: يااااه عارف اجمل احساس ايه
صديقى: ايه هو يا استاذة
انا: انك تحس انك منتصر..رغم الهزيمة فا انت منتصر
صديقى: نعم

انا: ايوه, منتصر رغم الهزيمة لانك ماخسرتش اللى عدوك خسره..هو خسر كتيير انه فكر يحاربك
صديقى: لا حول ولا قوة الا بالله..ايه يابنتى انتى فى معركة وحرب وانا مش عارف
انا: الحياة ماهى الا ساحة للعراك..فلتكن منتصرا او مهزوما
صديقى: لا حضرتك مش فاهم دى, بغض النظر اصلا ان كلامك اللى فات كله مش مفهوم
انا: بص يا سيدى, كتير بنقابل فى حياتنا ناس بنفتكرهم اصدقاء وناس قريبة لينا وبنحمل ليهم معانى جميلة وبنبدأ نديهم كل اللى جوانا من احساس ومشاعر برضه جميلة
صديقى: ها كملى هحاول افهم اهو
انا:وفجاة تلاقيهم اتغيروا وبان معدنهم الحقيقي ومقدروش كل اللى بتعمله عشانهم..بيطعنوك فى ظهرك ببطء وفى نفس الوقت بيرسموا ليك الابتسامة
صديقى:اه طب وده من ايه يعنى.. هما كده ولا ايه
انا: تصدق؟ برغم سؤالك بسيط الا انه كبييييير اوى ومش هاعرف اجاوبك عليه "هما كده ولا ايه" صدقنى معرفش
صديقى: اكيد بنى ادمين, لاننا مش ملايكة
انا:ماهى مشكلتى اصلا ان انا كنت فكراهم ملايكة.. بس للاسف طلعوا بشر
صديقى: انتى عايزة الجنة على الارض ولا ايه يا دينا
انا: لا, كنت عايزة اقابل حد انسان بجد.. مش عايزة فيه صفة زيادة.. يمكن عايزة كل حاجة تتشال منه ويتجرد من كل حاجة الا انسانيته
صديقى: يتجرد.. لا لا انا ماليش فى الكلام ده
انا:تفتكر ممكن؟؟
صديقى: طيب بقولك ايه, خلينا فى موضوعنا انتى انتصرتى ازاى رغم هزيمتك
انا:من غير رغى كتيير اقولك على الخلاصة
صديقى :ياريت لحسن انا بدات دماغى تلف واتوه منك
انا:عشان تسلب نصر عدوك ومتحسسهوش بلذة هزيمتك ابتسم فى وجهه
صديقى: اه انا فاكر انى قريت الجملة دى لحد قبل كده كانت بتقول "المهزوم اذا ابتسم افقد العدو لذة الفوز"
انا: دى جملة قالها شكسبير, فعلا فى الجون, عشان كده حاسة انى منتصرة
صديقى: مع احترامى لحضرتك وللاخ شكسبير اللى كتبها... يعنى ايه
انا:امممممم ماتحاولش تشغل دماغك, المعنى فى بطن شكسبير
صديقى: انا كان مالى ومال الليلة دى
انا: حقك عليا المرة الجاية اوعدك انك تفهم
صديقى: لما نشوف

تنويه: هو مجرد حوار مع صديق وهمى ولا تمت فكرة الحوار للواقع بشئ

! اتكسر القلم

الحكم على اربعة صحفيين بالحبس لمدة سنة مع التنفيذ *

حبيت اكتب واقول عن كل اللى جوايا بيدور

اتكسر القلم

قولت احكى اشكى ابكى يمكن اثور

اتكسر القلم

بكيت فى لحظة يئست فجاة سمعت صوت مقهور

اتكسر القلم

صممت اكتر

قولت هاكتب

عن المشاكل و لحد امتى هاتسوء الامور

اتكسر القلم

لحد امتى هايفضل الصمت مالينا

لحد امتى بنعيش فى ضلمة وجحور

اتكسر القلم

مبقاش ينفع فى الزمن ده غير مخادع منافق يقول كذب زور

اتكسر القلم

قولت اسكت

ارسم وردة

طفل ..بضحكة
شمس.. وشروق
بدر..وبدور

اتكسر القلم

وانسى الزمن والمكان

وانسى الحلم اللى كان

وانسى انين الطير بجناحه المكسور

اتكسر القلم

رسمت حطام احلام

اوهام انسان ..انه يعيش حر كريم

معذور

اتكسر القلم

بصيت فى رسمي

سالت نفسى هى ايه دى حياتنا

دنيا دى ولا مجموعة قبور

اتكسر القلم

دنيا عايش فيها الظالم مع المظلوم

قِبل يشاركه فيها ..مشكور

اتكسر القلم

قولت اكتب عن صحفى حر

فى بلد المحروسة كممته ايد جبان مغرور

اتكسرالقلم

شخبط القلم.. من كتر الذل والعبث

بخطوط وخوف لنفضل كده ويعدى علينا الدهور

اتكسر القلم

اتكسر القلم من كتر الالم ماخطى بسنه ولا رسم

حتى الحروف مابقتش تنكتب ..اختفت السطور

واتكسر القلم

Little Home

ده بجد؟؟

جاتلى الصورة دى فى اميل, بصراحة تستحق ان احنا نقف عندها شوية, ونسئل السؤال الطبيعى بضحكة مليانة استغراب

هو حصل ايه فى الدنيا

ندا

ندا دى بنت ابن عمى
اخر مرة شوفتها كانت صغيرة فى تانية اعدادى ولا حاجة
حاجة كده صغيرة اوى..دلوقتى بقت حاجة تانية.. سبحان الله الزمن بيعدى بسرعة اوى
كانت فيه مناسبة قريبة جمعتنا
وبالصدفة لاقيت ندى فى المناسبة دى
كنت متوقعة انى هاسلم على البنوتة الصغيرة
وامسح بايدى على شعرها ..لانها ماشاء الله كانت من الاطفال اللى فعلا يتقالوا عليهم زى القمر هى واخواتها
بس اتفاجئت ببنوتة كبيرة انسة كده, هى حجمها صغير مش كبير, بس تحس بانسة محجبة وقربت تجيب طولى وبقت فى سنة تالتة ثانوى دلوقتى ..بجد انبسطت بيها اوى
ندا قاعدة فى مطروح,, وكانت جاية القاهرة اسبوعين وماشية فاوعدتها بخروجة فى القاهرة
خرجت معاها,, حسيت بحاجات كتير كنت قربت انساها
الطفولة والضحكة الصافية والرقة والهدوء
حسيت فى ندا زى الوردة اللى لسه متفتحتش
لسه وردة مقفولة.. جمالها زى ماهو نقى.. عايشة لسه فترة البراءة
لا اتعاملت مع ناس وحشة ولا فكرها بقى وحش
ظنونها وتفكيرها عن الحياة لسه متلوثش
بمعنى اصح لسه شايفة الحياة حلوة لسه قلبها فرحان
تفكيرها بسيط اوى..معطياتها عن الحياة ابسط مما تتخيل
تعليقاتها عن اى حاجة بتشوفها تعليق عفوى وتلقائى
لا فيه نرفزة ولا فيه زعيق ولا شتيمة.. لما تشوف اى حاجة غريبة تقابلها بضحكة
تبتسم وتبص بعيون مستغربة,, تحاول تستوعب ده معناه ايه وده ليه وتفضل تسئل بفضول
هى كانت اللى بتسالنى وبجاوب عليها بس فى الحقيقة هى اللى كانت بتجاوب على حاجات كتير عندى من غير ما تحس ... انا كنت معاها كأنى بتعلم منها بجد
خلتنى افكر ان احنا كبرنا نفسنا بسرعة, بنتشكى كتيير,,بنشوف الحاجة الوحشة قبل الحلوة,,
وشنا فيه عبوس غريب.. اتعودنا على التكشيرة او حتى السرحان
عيوننا بقت فيها نظرة توهان مرسومة..ماشيين و مستنين نقع فى اى لحظة
بقينا عاملين زى الآلات ماشيين فى سير بنعمل حاجة ونخلصها عشان نعمل حاجة تانية
حتى مابنفكرش نتأمل اى حاجة, و لو فكرنا نتأمل ونسرح لازم نفكر فى حاجة تعبانا او وجعانا
بقينا نعّقد كل حاجة..كل حاجة.. حتى الامنيات,, بقينا نعقدها وبنتمنى حاجات صعبة المنال وبنفضل كل يوم نمّنى نفسنا بيها
اما ندا فا كانت امنياتها بسيطة جداااا كانت كل امنياتها تخرج فى يوم وتتفسح
نفسها تزور منطقة معينة..وتحس انها امنية هى متمسكة بيهاا اوى وطبعا ممكن تتحقق وبسهولة ممكن تفرحها
ياااااه يا ندا للدرجة دى الحياة سهلة ,,امال انا كنت مصعباها ليه
امال انا كنت شيفاها وحشة ليه,,شوفتها بعنيكى حاجة تاينة شوفت الحياة بسيطة اوى شوفتها رقيقة اوى
يمكن الحياة ناشفة مع الناس الناشفة ورقيقة مع الناس الرقيقة ..مش عارفة
بتمنى من كل قلبى تفضل ندا كده على طول ماتتغيرش مع الوقت كالعادة
لانى معاها اتغيرت فيا حاجات كتيير
بقيت معاها اضحك وافرح ومفكرش فى الوقت ..كان هدفى انى اسعدها اليوم ده بس الحقيقة هى اللى خلتنى سعيدة عشان كده بجد بشكرها ,, شكرا يا ندا جيتى فى وقت كنت كتير محتجاه

اهى ضربت شقلباظ

قرب..جرب..قرب

هنا مش بنهرج

الدنيا بقت سيرك..واللى ما يشترى يتفرج

الدنيا دى فيها كام بلياتشو

الزمن لطشه قفاه حرقه بجاز

الزمن وعده قام صدق هتشه

واهى ضربت شقلباظ

الاغنية

اغنية لما سمعتها استغربت اوى..بس عجبتنى اوى فى نفس الوقت

كلمات جريئة وجديدة.. لما تسمعها اول مرة تنتبه ليها وتستنى الكوبليه يتعاد تانى عشان تركز فيها اكتر

عجبانى كلماتها جدا وخصوصا اخر جملة اهى ضربت شقلباظ

سماعى للاغنية لا يعنى بالضرورة انى اتفرجت على الفيلم بس اكيد تشدنى انى اتفرج عليه

خصوصا ان معنى الاغنية حلو وصوت مدحت صالح من اكتر الاصوات اللى بحب اسمعها ولان اختياره لاغانى الافلام والمسلسلات اللى بيعملها بيبقى اختيار موفق فى الغالب, واحيانا لما بعرف ان مدحت صالح هو اللى بيغنى اغنية فيلم معين ببقى شغوفة اوى اسمعه واشوف الفيلم عشان اعرف حدوتة الاغنية.
مدحت صالح ليه اغانى لافلام مختلفة, اكيد مش فاكراها كلها بس اللى فاكره منه دلوقتى اغنيته حبيبى يا عاشق لفيلم شورت وفانلة وكاب طبعا دى من الاغانى المفضلة ليا, غنى برضه النور مكانه فى القلوب لفيلم امير الظلام , دى بقى بحب اسمعها لما بكون مضايقة
ده غير اغنية تتر مسلسل عباس الابيض كانت من الاغانى الجميلة ليه وبرضه كلمات جريئة جدا وفيها سخرية جامدة قدر يغنيها مدحت صالح ببراعة وعلقت مع ناس كتير وعملت جماهيريه كبيرة للمسلسل, كلمات الاغنية لايمن بهجت قمر..عامة ممكن اتكلم عن اغانى الافلام والمسلسلات اللى عجبتنى وعلقت معايا فى بوست تانى لانهم كتيير اوى سواء لمدحت صالح او غيره..

اسيبكم مع الاغنية ..صحيح الكلمات دى برضه لايمن بهجت قمر

وليه الغلط ده؟

قاعدة لا بيا ولا عليا
ماما جاية تقولى الحقى ده انتوا بتتهزقوا
قولتلها نعم..مين اللى استجرا ده ولعب فى عداد عمره
قالتلى تعالى ياستى اهو اقرى
كان عمود لواحد اسمه هادى فهمى فى المصرى اليوم بتاريخ 10-8..اصلا الراجل ده اول مره اسمع عنه
المهم المدعى ده بيقول علينا فى العمود بتاعه فى سطر ونص
"كلية اعلام القاهرة تحتاج الى عميد وعمدة! معظم خريجى الكلية مستواهم...بلاش! المستقبل الإعلامى يظهر انه ليس لهؤلاء!"
لو انت مكانى هاتقول ايه, واحد زى الاخ ده اصلا يترد عليه ازاى
يعنى عايزة افهم ماله مستوانا حضرتك..لا والنبى كنت قول .. انا معرفش ليه ماقولتش واسكتفيت بكلمة اكثر استفزازا منك زى بلاش دى
احب اقول ان هو اصلا مش لاقى حاجة يقولها
:واعتقد ان ممكن يكون فى مبررات لكلامه ده زى مثلا
ممكن يكون زعلان من حد فى الكلية, العميدة او اى دكتور عشان كان وعده بحاجة وقاله بالمرة هاتبقى تيجى مثلا مهرجانات التخرج ونفضله ومحدش عبره ولا قاله تعالى
او تقريبا بقى هو زعلان من حمادة امام فقال يضربه فى كلية الجماعة بتاعته
اصل اللى يقرا العمود يلاقيه عمال يتكلم عن الرياضة والاهلى والزمالك وتعاقد الاعب مين والعقوبات اللى اصدرها الاهلى فى مش عارف مين وشوتايم حصلت على الدورى الانجليزى وكلام من ده
يا اما بقى عنده ابن اخته فاشل ودخل كلية اعلام وعمال يسقط فا شاف انه مفيش فايدة منه وراح معمم ان الكلية كلها كده بما ان ابن اخته عمال يديله انطباع عن اصحابه فا الراجل يبقى معذور شاف نوعية ابن اخته فى صحابه فقال الكلمتين دول
طبعا ان مش هاقعد بقى اقوله لا والله يا عمو احنا كويسين ادينا فرصه نثبتلك ان احنا لينا مستقبل اعلامى
عمره ماكان بالكلام يا استاذ هادى, حضرتك اللى هاتشوف المستقبل ده لمين
بس ليا ملحوظة اخيرة
ملكش دعوة بينا الله يكرمك, خليك فى حالك ولا اقولك خليك فى الكورة بتاعتك دى هاتنفعك بلاش تغلط فى حد ممكن يزعلك

هو فى ايه

هو فى ايه

حاسة انى غريبة اوى الفترة اللى فاتت دى

يعنى حاسة انى مش طبيعية

عامة ده نتيجة طبيعية للاحداث اللى عندى

وممكن ماتكنش احداث ذات قيمة يعنى

الا انى يعتبر فى فترة خمول وبالفصحى انتخة

مش بنزل من البيت

بقعد على النت مش بعمل حاجة

الكلام ده من قبل ظهور النتيجة لحد اسبوع كده ولا حاجة

وكل ده فجاة اتغير

بدل ما كنت فى حالة غريبة ومش طبيعية بقيت فى حالة اغرب

يافرحتى

شوفتوا الهنا اللى انا فيه

لا بجد مش عارفة اوصف احساسى

اصل حضارتكم الاسبوع اللى فات ده سافرت

روحت اسكندرية

وما ادراك اسكندرية

يعنى البحر والهوا المنعش والمشى بليل على الكورنييش والقمر والنجوم والصفاء

وانك تبقى مع نفسك؟؟ها مع نفسك؟..وشوف بقى لما تبقى مع نفسك ممكن تعمل ايه

يا دى النيلة ما بلاش انا

ادينى قعدت مع نفسى وكان تقريبا معايا معلقة

قلبت بيها كل الموااااااجع والمفاااااااارح بالمرة

عملت تلخيص مفصل مصغر سريع بسيط موجز مختصر معرفش ازاى

عنى الفترة اللى فاتت

تقريبا كانت حالة فحص حالة بالنسبة ليا

معرفش بقى,, المهم حالة الفحص عدت الحمد لله معرفش بقى على خير ولا على حاجة تاينة

انا حتى الان غير مدركة لاى حاجة

انا حاسة انى مش فى وعيى

والجميل انى نزلت على القاهرة

مش فايقة للحر والخنقة

واتخدت من الدار للنار يعنى من الاجازة نزلت تدريب على طول

مع انى كنت عايزة انزل من البيت باى طريقة بس مش كده

مش من اسكندرية على التدريب

ده حتى الواحد مالحقش يفوق من الحلم اللى كان فيه

عامة كل ده كلام جيه فى بالى حالا,, ومش هو ده اللى كنت عايزة اقوله اصلا

بس قولت فكرة رئيسية انى فى حالة غريبة وده عشان ادخل على موضوع انى مابقتش اتكلم

او اكتب حاجة او اكتب اى بوست

مش لاقية حاجة اقولها,,

وغير كده اللى كتبته لاقيته كئيب اوى

اوى اوى كمان

ماردتش انزله بصراحة لانى انا اكتئبت لما قريته

ليه اكئب بقى غيرى

فا قولت بلاش..

غير كده حاسة انى بقت بلوجر نص كوم

ايوه نص كوم ,, يعنى مبقتش ارد على التعليقات, يبقى كويس اوى انزل بوست ( اى كلمتين مش موضوع محترم) وشكرا على كده

لا برد على حد ولا حتى بعلق عند زمايلى

لدرجة انهم افتكرونى مخصماهم, او بنفض ..والله ابدا

انا بقى هنا حبيت اوضحلهم انى بجد فى حالة غريبة مش عارفة افسرها.. ماليش نفس لاى حاجة.. ويمكن والله ماليش نفس اكتب

حتى الكلام ده قبل ما اسافر

عامة الواحد دلوقتى بقى احسن بعد فترة الاستجمام اللى عملها

وربنا يسهل هحاول بقى اظبط الموضوع ده

عامة ممكن ابقى انشر حاجات كتبتها واكيد هتكون متأخرة بس هاحطها بدل الجفاف اللى بقت فيه المدونة ده

يالا ربنا يسهل

صحيح.. عودا حميدا لى:)

Live with dignity

" There's no more enslavement,
You are the king of your self
Feel the victor,
Enjoy your life,
Live with dignity "

احد فوائد الفوتوشوب

هاحكلكم مثال بسيط اوى حصل معايا وفعلا استفدت من الفوتوشوب فيه

الواحد احيانا بيبقى مركز مع نفسه

وبيتأمل المكان من حواليه
ويا سلام لو انت على البحر

وشايف غروب الشمس

لو انت من محبى التصوير بقى

اول حاجة هاتيجى فى دماغك

انك تاخد صورة للمشهد الروعة ده

اللى انت مش بتكتفى بس بمشاهدته

الا انك عايز تسجله وتستمتع بانك قدرت تسجل اللحظة دى

طبعا الغروب بيتكرر كتيير

بس الفكرة هل احساسك باللحظة دى بيتكرر

طيب هل عينك هاتقدر تحس بسحر اللحظة دى تانى

ده بيخلينى دايما بيكون معايا الكاميرا فى اى وقت

نرجع لمكان الحدث

طبعا المكان اسكندرية والوقت هو الغروب

واقفة فى اكثر لحظاتى التحاما مع الطبيعة

بحاول اسجل اعجابى بيها

وبالمنظر الساحرى الجميل اللى قصادى
وبسرعة بطلع الكاميرا (موبايل ماكنتش جبت الديجتال لسه)

وبسرعه بدوس عشان اخد اللقطة

حلوة اللقطة ..يا سلاااااااام ايه الجمال ده

ايه ده..مين ده,, طلع منين دة

ايه العيل ده وطلع منين

ولا ابوه كمان عايز ياخدلى كادر هو كمان

هى ايه الناس دى..ما بتصدق

الكاميرا تصور يجرى يقف قصادها!!عادة غريبة

لا وتحس ان الولد بيجرى منشكح ومبسوط كانه هاينزل فى الجورنال صفحة اولى مثلا

طيب وبعدين يعنى,, ارجع انا اسكندرية تانى عشان اصور

ولا استنى اليوم اللى بعده واصور تانى الغروب

المهم المنظر ده ماكنش ينفع ناس فيه باى حال من الاحول

وبعدين لما فتحت الصورة عندى على الكومبيوتر طبعا اتعكننت فى الاول

لان بصراحة المشهد مش عايز حد لطيف ظريف يجرى قصادك وانت بتصور

قولت مش مشكلة,, وطبعا على طول فتحت الفوتوشوب (منقذى)

افتح الصورة ..هات التول.. شيل العيل.. شيل ابوه

اضحك الصورة طلعت حلوة

والله كويسة مش بطالة

صورة عدلة اهى ولا انتوا ايه رأيكم مش الفوتوشوب ينفع برضه ;)

* اللقطة من اسكندرية صيف 2006

تاجى الثانى

التاج ده ماتفتحش مدونة الا لما تلاقيه.. تاج غريب..سره باتع.. المهم انا طبعا لازم اشكر هدى على تمريره ليا وعشان خاطرك يا ستى جاوبت عليه

من هو:أحب شخص لقلبك فى الدنيا؟

والدى ووالدتى ومحمد وهبه
ورنا اختى الصغيرة اللى بعتبرها بنتى وطبعا طبعا اصحابى ربنا يخليهم ليا

انسان مستعد تضحي بحياتك - ركز فى كلمة حياتك- علشانة؟

حياتى !
ممممم
اهلى طبعا
واى حد يستاهل
وطبعا على حسب الموقف
يعنى ممكن حد معرفهوش واضحى بحياتى عشانه ومش مثالية بس انا عارفة نفسى

اسم أول حب؟

ملكش دعوة

اسم اخر حب(حتى الان)؟

دى بقى ملكش فيه

ما هو :اسم أجمل كتاب كتبه بشر قرأته ومحتفظ به حتى الان ؟

لا مفيش كتاب معين
بس لما بجيب كتاب بحطه فى المكتبة بتاعتى وبقراه كل فترة

اسم كتاب-كتبه بشر برضة- انت متعلق بيه وبتقرأه كل فترة؟

فيه كتاب اسمه كنوز المعرفة ده ممكن اقراه كل لما يقع فى ايدى لان فيه معلومات ماكنتش اعرفها وبيجيب تفسير للحاجات الغريبة فى حياتنا, هو كتاب شيق جدا لانه كل صفحة فيه بيجبلك حاجة مش عارفها
وبحب نوعية الكتب اللى زى دى ..اللى بتقدم معلومات عن حاجات غريبة وجديدة ومش معروفة

شىء تحس بالراحة النفسية عندما تنظر اليه ؟

لما اسرح فى وش طفل رضيع بيبصلى
لما ابص للسما والنجوم وانا على البحربليل
ضحكة والدى ووالدتى ليا وهما راضين عنى
لما بص فى وردة مهداه ليا من حد كنت مستيناها منه
لما شوف فرحة اى حد فى عيونه (وخصوصا صحابى البنات)

مكان تحس فيه بالحنين الى شىء لا تدرى ماهو و ذكريات جارفة الى لاشىء ؟
اماكن كتييير
يعنى مثلا لما بعدى قدام مدرستى الاعدادية (نور الاسلام) بحس بحنين فظيع للايام دى وذكرياتى اللى عمرى ماهنساها
لما بروح بيت جدتى كنت بلعب فى كل ركن فيه وخصوصا الفرندا , وهناك كل شارع بيحمل فيه ذكرى ليا
جنينة الاورمان, برضه بحس بحنين للايام اللى كل العيلة كانت بتجمع فيها وانا كان فىشجرة كل مرة كنت بروح اقعد عندها واتصورت عندها, كل سنة كنت بروح الجنينة لازم اشوف الشجرة
كفاية عليكوا كده

مكان تحس بالراحة عندما تدخله ؟

البيت واوضتى
بحس براحة ما بعدها راحة لما ادخلهم
المسجد
بيت جدتى
واى مكان مفيهوش ناس كتير

اجمل مدينة زرتها داخل مصر ؟

طبعا معشوقتى مرسى مطروح
بحبها حب مش طبيعى
انا كنت بروحها كل سنة بقعد فيها ال3 شهور الصيف كنت بشتغل مع والدى هناك
لافيتها كلها.. يمكن البحر ماكنتش بنزله اصلا خلال ال3 شهور غير اسبوع ولا حاجه بس كان لازم كل يوم انزل اتمشى على البحر لوحدى

أجمل مكان طبيعي رأيته داخل مصر؟

بصراحة بحر مطروح وكل مكان فيها والا ماكنتش حبتها الحب ده كله

اهم جهاز منزلى انت متعلق بيه او بتستخدمه كتير ؟

اكيد الكومبيوتر

نوع هاتفك المحمول؟

ما انت كنت ماشى كويس, نوكيا 1110

سرعة بروسيسور جهازك ؟

2.6 جيجا هرتز

حجم ذاكرة –هارد- جهازك ؟

80 جيجا بايت

المساحة التى تشغلها المواد الاسلامية على جهازك ؟

مساحة كويسة الحمد لله واتمنى انى ازودها اكتر

نفس المساحة السالف ذكرها فى قلبك-الاجابة لنفسك عشان الرياء يا اخواننا ؟

طيب عامة هى نفس الاجابة السالف ذكرها

أهم هدف انت واضعه لحياتك دلوقتى ؟

انى اخد خبرة دلوقتى فى مجال الصحافة
واطور نفسى فى التصوير واتعلم كل حاجة متعلقة بيه من فوتوشوب وتدريب وحتى لو وصل الامر لدراسة اكاديمية للتصوير واشتغل حاجة تدعم ده اطور من نفسى فى اللغة وطبعا

مواصفات فتاة –أو فتى للبنات- الأحلام بالنسبة لك؟
اولا برفض مسمى فتى الاحلام ده
لانى مؤمنة انه فتى الواقع ..يعنى مش هايفضل فى احلامى كتير انا مستيناه حقيقة اعيشها
ثانيا انا ماليش مواصفات لانى واثقة ان النصيب لما بيجى كل الاحلام الخرافية دى مش هايبقى ليها وجود اصلا
وانا من النوع انى ممكن اتقبل اى حد مهما كانت صفاته واستحمل فيه الصفات حتى الغير مرغوبة بس عشان اريحك هاقول صفات المفروض اساسية هو اكيد لازم يكون ملتزم اخلاقيا ودينيا
اهم بقى حاجتين انه يحبنى جدا ويتقى الله فيا
الى جانب ان مش لازم نكون انا وهو متفقين, يعنى ممكن يكون مختلف تماما عنى بس الاهم نكون متفقين على الاختلاف ده
وطبعا كل حاجه ليها حدود يعنى الاختلاف المقبول
حاجة كمان صحيح, اكون كل حاجة بالنسبة ليه ..لان اقل حاجة انا هاقدمهاله انه هايكون كل دنيتى

صف ما يأتى :شعورك لما بتسمع كلمة مصر؟

عادى جدا..شعور اى واحد بيحب بلده
بفتخر بانى منها
وبحس انى عايزة اعمل حاجات كتير عشانها برغم ظروفها, ويمكن عشان ظروفها دى اصلا

شعورك لما بتسمع كلام عن اليهود ؟

مش عارفة
يعنى لو كنت سئلتنى السؤال ده من 5 شهور مثلا كنت هاقولك قلق وتوتر وبضايق من سيرتهم
لكن دلوقتى محتارة جدا لانى قابلت يهود ومحستش بكل ده وقعدت واتكلمت معاهم..فى الاول قلبى اتقبض لما عرفت انهم يهود وبعدها عادى اتكلمت معاهم
بس ده لا يمنع انى لما بسمع اسرئيلى بتجننهافضل اكرههم حتى لو مفيش سبب حتى لو التاريخ محى كل حاجة عن ماضيهم الاسود ويمكن كرهى متمثل لاى صفة بتكون فيهم: زى الخيانة والكذب وانتهاك حقوق الغير وتشويه الحقيقة ..وكل اللى نفسك فيه

شعورك لما بتشوف ظابط شرطة ؟

والله على حسب المكان اللى بشوفه فيه وعلى حسب الموقف
يعنى مثلا لما بشوف ظابط فى مظاهرة وواقف مترقب لاى واحد عشان ياخده بحس بالاشمئزاز من ناحيته
ظابط واقف مثلا فى دورية بليل او حراسة او بيقوم بوظيفته عادى اللى هى الامن مش بخاف منهم
اصل كل مكان فيه الكويس وفيه الوحش
بس للاسف فيه اماكن الوحش لما بيظهر بيبقى وحش اووى خصوصا لو فيه سلطة ونفوذ
وبيبقى فيه فساد جامد
وده على لسان ظابط نفسه يعنى مش كلامى انا بس

شعورك لما بتشوف الكناس العجوز فى الطريق ؟

بضايق عشانه
عشان مش عايش زينا
وبتعلم منه
الرضا على وشه والابتسامة
اللى بتختفى من وشوش ناس عايشين احسن منه

لون البطانية اللى بتتغطى بيها فى الشتاء ؟

نعم!!فوحلوقى..فرقت يعنى

لون الجورب-الشراب- المفضل لديك ؟

ايه يا عم ,, شراب ايه.. عيب كده

احساسك اذا داست قدمك فى الطريق على مخلفات اخراج حيوان- *** ولا مؤاخذة؟

بص انا حاسة ان السؤال غريب ومش فى مكانه بس فيه معنى وراه ..عامة
بحس باحساس مريع وببص بقرف لرجلى وبحاول امسحها فى الارض وبكمل مشي
(زى بتاع الكبدة يا عمرو):D
ماهو لازم امشى يعنى مش هاقف, كتير الواحد بيقابل حاجات مش كويسة فى طريقه غصب عنه هايخدعه بصره وبصيرته فى مرة, ويمشى عليها رغم محاولته كل مرة انه يتجنبها بس لو تعثر فيها عادى ينظف رجليه ويكمل مشى

افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف ؟

برضه على حسب
فى ناس بحس براحة لما بشوفهم بقول ماشاء الله ربنا يكرمه
وفعلا شكلهم بيشرح القلب
(لسه امبارح والله شوفت واحد كده ومعاه واحدة منقبة ومسكها وخايف عليها بجد فرحت لما شوفتهم ودعيتلهم ان ربنا يكرمهم)
وناس تاينة بيبصولى شظرا كده وبطريقة غريبة ويستغفروا ربنا ويستعيذوا من الشيطان ويتعمدوا يسمعونى صوتهم
طبعا دول بيسيبوا انطباع عندى مش حلو
بس بقول ربنا يهديهم ويعرفوا ان الدين معاملة

احساس يراودك فى اشارة مرور مغلقة بسبب مسئول كبير؟

بص بمسئول او من غير هى بتبقى واقفة خلقة بس لما بكون مستعجلة اكيد بتخنق
وطبعا المسئول ده بياخد اللى فى النصيب من الدعا عليه
فى العادى بقى بقعد اتفرج على تعبيرات الناس من الموقف
وطبعا بتشوف حاجات ربنا مايورهالك الناس مقهورة ومتاخرة
فا بالتالى برضه برجع ادعى تانى على الاخ المسئول
يالا عشان يحرم يوقفنا فى اشارة تانى

بمرر التاج ل عمرو , مروة، واللى عايزه مايغلاش عليه

Message in a bottle

No matter how far you are


we will always be thinking about you here





Happy Birthday to a specail, magical, and wonderful Aisha

طيب وبعدين

طيب وبعدين

لا ده انا بكلم نفسى

بقول لنفسى طيب وبعدين مش هانخلص بقى من الموال ده

عادى يا جماعة الواحد بيجيله وقت محتاج يكلم نفسه

يعنى انت مثلا ما قعدتش مع نفسك قبل كده وكلمتها

وكان عندك حوار (اى حوااار قديم) وطوّل معاك اوى

وبدأ يسخّف وسيرته اصلا تبقى ملهاش لازمة

وبقى زى النكتة البايخة ومفيش فايدة اصلا من ذكره

وجيت قولت لنفسك طيب وبعديييييييين

وطبعا الحوار ده هو كله على بعضه سيرة نكد

مفيش اى جديد بيحصل فيه لانه اتقفل من زمان

بس تقول ايه بقى النفس البشرية وعشقها الابدى للنكد

ماهو انت لو ملقتش حاجة تنكد عليك تفتكر الموضوع ده

والعكس صحيح لو لاقيت حاجة نكد تلقائى جدا تفتكره

طيب وليه السيرة ال ... ولا بلاش

وبرضه مصمم انك تفكر فى الموضوع وان حتى يخطر ببالك للحظة واحدة

وتتكلم فيه تانى مع اى حد يفتحه معاك ده غير انك ما بتصدق اصلا

حد يتكلم فى موضوع مشابه وتبدا انت ترمى كل اللى عندك

وكانك ما صدقت حنفية واتفتحت

وتعيد وتزيد وتجيب من الشرق والغرب

عشان تكلّم عن نفس ام الموضوع ده

عارفة هاتعمل زيى وهتاخد وعد على نفسك انك ماتكلمش فيه تانى خالص

وبعدين تقعد فترة هى مش طويلة بس بالنسبالك طويلة جدا

عشان انت اصلا دماغك شغاله فيه حتى لو مش بإرادتك

وتعمل نفسك بقى خلاص نسيت وقفلت الحوار نهائى

ولو حد سئلك تبتسم ابتسامة ثقة كده معناها ولا على بالى ؟

بس على مين ده انت اصلا وانت ماشى بتتكلم مع نفسك فيه

طيب وبعدين يعنى

لا بجد يعنى مش هاينفع كده

ماتشترى دماغك وتنجز فى الحوار

عادى وخد وعد مع نفسك انك متفكرش فيه تانى

وماتتكلمش عنه مع اى حد

ومتحاولش تعمل الحركات اللى انا بعملها دى

اللى هو سيرة ايه وبتاع ايه

يا عم انا اصلا نسيييت

واول ما تقعد لوحدك تفتكر تانى

لا ... انا بقولك اهو عشان ابقى بريت ذمتى منك

هاتقولى طيب ما انتى بتعملى نفس الحركات

هقولك ما انا بعاتب نفسى اهو وبقولها طيب وبعدين

وكتبت البوست ده مخصوص عشان ماتكلمش فى الحوار ده تانى

ومانكدش على نفسى تانى

مش هافكر ولا افتح السيرة دى خاااالص .... وانا يا السيرة دى بقى


مش هافتحها تااااانى

حرمت خلاااااااااااااااااااااااااص


وطبعا هاتسئلنى طيب ايه الحوار ده

وهاضطر انى افتحه تانى واحكيهولك

عامة هاتكون دى اخر مرة اتكلم فيه

سامعاك على فكرة

بس ماتقولش تلاكيك

ده مجرد لرفع اللبس والغموض عن القراء

دايما الموضوع اللى شاغلنى هو ارتفاع الاسعار مش عارفة ابطل تفكير فيه :D

وحشتونى

انا حالتى النفسية دلوقتى فى النازل جدااااا
وده لانى بعيدة عن اغلى اصحابى
تقريبا دى اول مرة احس انى بعيدة عنهم كده
او ممكن تقول مش عارفة اوصلهم
الاول لما كنت بشتقلهم ببقى عارفة انى هاقدر اجيبهم وهاشوفهم
دلوقتى ...مش عارفة
محدش هايتخيل احساسى دلوقتى ازاى
لما حد بتشوفوا على طول كلت وشربت وكنت معاه ليل نهار وفجأة مش عارف حتى تسمع
صوته.. لو كان الكلام يعرفك الواحد عامل ازاى وشكله ازاى اكيد هاتحسونى وانا بكتب الكلام ده
وهاتحسونى انى عايزة اقول بكلامى ده
انتوا وحشتونى اوووووووووى
عائشة وحشتينى اوى وعشان خاطرى ابقى طمنينى عليكى ربنا يصبرنى الفترة دى لحد ما اشوفك تانى
كنت عايزة اجيلك اسكندريةواقابلك انتى واميرة ونخرج زى خروجاتنا على
طول ونتخانق مين اللى يجيب الاكل ومين اللى يجيب الحاجة الساقعة ومين اللى يجيب الايس كريم بس اللى صبرنى
ان اميرة قالتلى انى كنت معاكم وجبتوا فى سيرتى (كان نفسى ابقى موجوه اوى) بس للاسف منفعش
سلمى واميرة برغم انكوا معايا على طول فى بالى وقلبى الا انى مش عايزة احس انكوا مش قدامى ولو
لحظة واحدة.. بجد بحس انى عاجزة لو معرفتش اوصل لواحدة فيكم
علا كان نفسى احضر يوم خطوبتك ... بس انتى عارفة ايه اللى منعنى عنك.. ربنا يتمملك بخير يا
حبيبة قلبى, كان نفسى اوى اشاركك الفرحة دى واهيصلك زى ما وعدتك ونسهر للصبح مع
بعض ..بس.. سامحينى, ومش هاسيبك يوم فرحك ان شاء الله,خلى بالك من نفسك
هدى وشيماء دايما وحشنى ونفسى اشوفكم قريب وعارفة ان احنا بنتواصل على النت بس وحشنى اشوف
ضحكتكم عايزة اسمع صوت كل واحدة فيكم وهى بتنده بأسمى
خلود وايثار, اسئلوا !!.. انا عارفة انكم بتجيبوا سيرتى وبتسئلوا عليا بس عايزة احس بوجودكم
اعتبروه رجاء اعتبروه طلب.. بس انتوا عارفين انا بحبكم قد ايه وانتوا عندى قد ايه
وبجد وحشتونى اوووووووى

بسمع الاغنية دى بفتكركم ولما بتقول

Tell me why

I can't be there where you are

There's something missing in my heart

Get this widget Share Track details

الحلم المستحيل

اطفات نور غرفتى, فتحت نافذة الغرفة بسيطا حتى استشعر نسيم الليل فى ذلك الوقت
حيث كانت الساعة تقارب على الرابعة فجرا, وكعادتى نظرت الى السماء قبل ان استغرق فى النوم اتسائل هل غدا افضل؟ثم تنهدت برضا عميق بداخلى ,وهمست قائلة الحمد لله لازلت اتنفس واحتضنت وسادتى كاننى احتضن الدنيا بين يدى, اغمضت عينى محاولة استدعاء النوم, وقام عقلى بتجميع خيالات فى البداية ليس لها معنى
ثم تكونت احداث فى عقلى فى الحال, انتقلت الى نفس المكان الذى كنت فيه منذ ايام قليلة
وتجسدت اللحظة التى عشتها سابقا بكل معانيها وبكل انفعالاتى من قلق وتوتر وانتظار
وبالطبع اضفت بعض التغيير فيها من اشخاص معينة, اردت وجودهم ولكنهم لم ولن يحضروا
فا كانت مجرد احداث بالفعل حدثت واخرى تمنيت ان تحدث
فا عشت الحدث مرة اخرى بطريقتى عكس الواقع نسجتها من خيالى لعلها تكون الحلم
!وتبدا وقائع الحلم لتشدنى والتى لطالما تعلقت بها بل وجعلتنى ابتسم ابتسامة واقول ليتها كانت حقيقة
لكم تمنيتها ان تحدث, وخططت لها كثيرا وانتظرتها بلهفة شديدة, فهى مخالفة للواقع, نعم هى بكل المقاييس صعبة بل مستحيلة الحدوث
ولكن انتهى بى الامر اننى وحدى , ووحدى فقط شعرت بالمرارة والخذلان لانها لم تتعدى كونها امنية فى عقلى
وحدى فقط اردتها ورأيتها كحلم بل وكنت ارى كل من فيها كالطيف باهت الملامح
وانا فقط التى بها واضحة, لم اكن وحدى بل كان دائما معى واضح الملامح مثلى تماما
استغرقنى التفكير بها وتعمقت بل تتطورت الاحداث لاكثر مما تمنيت
فوجدت وحلمت بكل ما افتقدته فى تلك اللحظة الخاصة التى عشتها ومررت بها دون ان اشعر بها
على الاقل كما تمنيت وكما خططت لها
لدرجة قد اثارت انتباهى للاحداث وازداد وعيى لها
فلكم تمنيتها ولم تتحقق والان هى مجرد حلم اتخيلة فلم يتبق لنا سوى الحلم
فلن يستطيع احد ان يتحكم فيه او يفرض عليّ ما لا ارغبه, ساحقق كل ما اريده فيه وبدات اركب الاحداث وانسجها كما ارغب وكما اردت تماما
ولان الحلم كان غريب ومخالف للواقع وكنت انتظره كثيرا فقط كمجرد حلم ليس اكثر
فعقلى الباطن حتى لم يكن يسايرنى فقد خرج عن نطاق المنطق والعقل
فتنبهت فجاة واستغربت كيف احلم بما هو مستحيل, فتعودت ان حلمى لا يتجاوز الواقع والا يجعلنى احلق فى السماء حتى اقع على وهم وسراب يؤلمنى
ولكن هذه المرة حدث وتجاوز لذلك لم اتممه فا تنبهت وجلست اتامل فيما كنت احاول ان احلم به ثم تحسست سعادة غامرة بداخلى, كم هو حلم جميل!! كم هى لحظة فاقت الوصف !! ولو انها كانت حقيقة لما كنت شعرت بجمالها هكذا فقد نسجتها بنفسى كما اريد, نعم هو حلم غير واقعى ولكنه بالفعل جميل
فاردت استدعائه محاولة ان اعيش نشوة هذه اللحظة مرة اخرى
ولكنى لم استطع اعادته فحتى الحلم لا ياتى الا مرة واحدة كما نعيش الحقيقية, فهاجرنى الحلم وقتها او بالاصح الخيال فهو حلم قمت بصناعته بنفسى.
تنبهت مرة اخرى الى أذان الفجر فهممت للصلاة ودعوت الله فى الصلاة من قلبى وحتى انى لم انطقها بلسانى فوحده يعلم بما فى الصدور وايقنت وقتها ان الله معى يرانى ويسمع ما فى سرائرى
ثم عدت للنوم مرة اخرى ولكن هذه المرة اغمضت عينى واخذنى النوم العميق فاندثر الحلم مع اندثار خيوط الليل الاخيرة قبل الشروق
واسدل الستار على تلك اللحظة التى عشت فيها الحلم المستحيل.

YOUTHINK مجلتى

مش عارفة اقول ايه ولا ابدأ بايه

عامة دى صورة غلاف المجلة

مشروع التخرج بتاعنا

YOUTHINK

والحمد لله اخدنا مركز تانى

وكنت هاكتب العنوان عذرا مجلتى

لانى ماتكلمتش عنها ومديتهاش حقها

بس اعتقد ان زمايلى ادوها الحق وزيادة

يمكن سجلوا كل حاجة

كتبوا عن الفكرة وعن المجهود اللى اتعمل فيها

وانا مش هاضيف جديد عن اللى قالوه

ده حتى لحظة اعلان النتيجة

لحظة ما اخدنا مركز تانى

دى كمان نزلت على بلوجات زمايلى

بس الفترة اللى فاتت دى

حاسة كانى ماكنتش فى كامل وعى

تقريبا كأنى فى غيبوبة

لسه مفوقتش من الصدمة او الفرحة

وغير كده

حاسة ان الكلام عاجز انه يعبر عن اللى جاويا

فآثرت الصمت زى ما بيقولوا

بس ماقدرتش بقى

خلاص فوقت وقادرة اتكلم

عن احلى حاجة حصلتلى فى حياتى

كل اللى ممكن اقوله

ان المجلة دى على المستوى الشخصى

ليها معنى مختلف تماما عندى

ماكنتش مجرد مشروع بالنسبة لى

او مجرد مجلة وهتاخد مركز او مش هتاخد

كانت اكبر من كده بكتير

كانت حاجه اتجسدت فيها كل مشاعر

الامل والحلم والتعب والصبر والمثابرة واليقين والنجاح

يمكن حياتنا كلها بنمر فيها بمشاعر زى دى

بس انا عشت كل دول فى المجلة دى

حسييت وعرفت حاجات كتير

يمكن محتاجة عمر تانى عشان احسهم تانى

قربت من ناس واشتغلت معاهم

وجمعنا حلم واحد

وتقريبا ماكنش يجمعنى بيهم اى حاجه

مجرد ابتسامة من بعيد

بس بقينا نفكر بدماغ واحدة

بنحس بحاجة واحدة

حاجة واحدة جمعت 17 فرد

شالت كل الحواجز مابينا

كلنا بنسعى عشان نحقق هدف واحد

اول مرة احس انى داخل فريق زى كده

اول مرة مافكرش فى تعبى انا بس لا فى تعب غيرى

لاول مرة بفكر انى اعمل كل اللى اقدر عليه

عشان ماخذلش غيرى اللى تعب

وحط ثقته فيا

وبجد انا فخورة بكل واحد

اشتغلت معاه واحتكيت بيه من المجموعة

وبقولهم بيكم عرفت معنى الصبر

ومعاكم شفت الحلم حقيقة

ولولاكم ماكنتش حسيت بطعم النجاح

النجاح اللى بهديه لاكتر ناس تعبوا معايا

واستحملونى كتير و كان بيشجعونى دايما

كانوا مصدر الهامى

ومن غيرهم ماكنتش هاقدر

ادى اى حاجة للمجلة دى

يمكن قصرت فى حقهم كتير

بس برغم كده دايما كانوا واقفين جمبى

والدى ووالدتى

ليكم بهديكم الفوز الغالى ده

واللى خلانى احس فعلا انى عملت حاجه تفتخروا بيها

لما شوفت دموع الفرح فى عنيكم

دى كانت عندى بالدنيا كلها

الحمد لله

مش هانسى ابارك لمجموعة

كتب خانة

اللى خدوا المركز الاول وكانوا يستحقوه

بجد بحترمهم وبحترم شغلهم

مبروك عليكم وعلينا الفوز

ملحوظة : فى اهداء خاص جدا لمحمد وهبه هاينزل فى بوست تانى ان شاء الله

روابط اخرى عن المجلة
لحظة الفوز

بوست عمرو
بوست ايمن
بوست سلمى
بوست محمد

مبروك يا عبد المنعم

حمد لله على سلامتك يا عبد المنعم

ربنا انعم عليك بالحرية

وانعم عليك بحب الناس

وانعم عليك بقلم حر ونزيه

وانعم عليك بقوة وصمود فى وجه الظلم

وانعم عليك بالايمان والثبات

وانعم عليك بصبر لا ينفد

وانعم عليك بابتسامة دائمة مليئة بالعزيمة

ادامها الله لك نعما غالية يعيش كثيرا دون ان ينعم بواحدة منها

مين غيركم

جوايا كلام كتييير اوى عايزة اقوله كلام كتير اوى عايزة احكيه واكتبه رغم انى عارفه انى مهما اكتب مش هاقدر اوصف ربع اللى حاسه بيها احاسيس كتيرة متناقضة ومختلفة انا حسة بيها دلوقتى وانا بكتب مابين سعادة وفرح وحزن وااشتياق وحنين

افكار ووجوه واوقات وايام ومشاعر كلها اتجمعت وكلها بشوفها وفى بالى دلوقتى زى شريط السينما بالظبط وهو بيتحرك كلها مشاهد بتتحرك ورا بعض قدام عينى صورة صورة

من اول يوم دخلت فيها الكلية لحد اللحظة دى كل وجه شوفته بملامحه بضحكته بتقاسيم وشه بنبرة صوته بحركة اديه بابتسماته بطريقة سلامه عليا, كل حاجة فكراها وعقلى استدعاها دلوقتى لحظة ماحطيت صوابعى على الكيبورد وقررت انى اكتب حاجة عن اجمل ايام عمرى بل اروعها بالفعل

احساس انك تكتب عن حاجة وتسردها كانها ذكرى, احساس صعب اوى انا رفضت الكتابة فى الاول لانه وجعنى اوى ..وجعنى انى اكتب عن لحظات عشتها وكأنى مش هاعيشها تانى, لحظات خلاص عدت ومش هاترجع, يمكن اترددت كتير انى اكتب عن اصحابى وزمايلى فى الكلية وانى خلاص بعيش اخر ايام فى الكلية والدراسة بشكل عام لانى مش لاقية كلام اقوله فى وقت زى ده, لانى اول مره اعيشة.

انا فاكرة اخر محاضرة ليا كانت من ايام قليلة ويمكن زمايلى كتبوا عن اليوم ده وحطوا صور لينا فى الكلية...اليوم ده انا مخدتش ولا واحده بالحضن ولا سلمت عليها كانى مش هاشوفها تانى محبتش لحظة الوداع حتى دموعى مانزلتش قدام حد كتمت كل ده جوايا وقتها..كنت فاكرة انى هاحس بالغربة وانى هاودعم لاقتنى بطريقة لاإرادية برفض الاحساس ده جوايا واتعاملت انه يوم زى اى يوم تانى كنا بنقضيه مع بعض يوم عادى جدا بس حسيت فى العيون كانها بتتكلم بكلمات الحب والوداع والاسف والاعتذار والود بعيون رافضة الفراق بس حاسه انه قرب خلاص

انا عارفة ان احنا اكيد مش هانفترق بس مش هايجمعنا مكان واحد مع بعض تانى..مش هانشوف بعض كل يوم زى ما كنا بنشوف بعض كل يوم لمدة اربع سنين فاتوا, حتى فى الاجازه كنا بنتدرب ونشوف بعض وبنشتغل مع بعض , مش هنتاقبل ونلاقى بعض بسهولة زى الاول خصوصا ان فينا بنات من اسكندرية كانت الكلية هو بيتنا التانى اللى بنتقابل فيه

مش متخيلة انه هايجى عليا يوم مش هاصحى والبس واجرى على المحاضرة واكون فرحانه انى خلاص هاقعد مع صحابى البنات واكون متأخرة وعائشة ترن عليا تفهمنى ان الدكتور دخل واول ما ادخل تقابلنى بضحكة فيها معنيين لوم على التاخير ومعنى عن كلمة وحشتينى وتطلع ايدها من تحت الخمار وتحط ايدها التانية على ظهرى رغم انى عارفة انها مش بتحب تحضن حد بس بحس انى بكون قريبة منها اوى اللحظة دى وبكون مش عايزة اسيبها ولا انى اشوف سلمى وتسلم عليا وتقولى ازيك يا باشا وتنط من على المدرج لغاية لما توصلى وتقعد تحكيلى يومها عملت فيه ايه واخر حاجة حصلت انا معرفهاش وتجبلى لامبادا معاها عشان اكله وتطمن على اخر اخبارى وتسمعنى للاخر وكلامنا الكتير عن كل حاجة ولا اميرة لما تسلم عليا بابتسامة وتقولى اتاخرتى ليه وكنتتى فين واضحك واقولها المواصلات ولما تسالنى وتقولى معاكى منديل ولا لاء ده عشان هى بتغسل وشها كل دقيقة تقريبا و بعدها تحكيلى عن الحاجات اللى فرحتها وضايقتها اللى بسهولة بتنقلى احساسها ده سواء كانت مبسوطة او زعلانة ولا من علا عبد القادر لما تحضنى قوى وهى لسه جاية من اكسندرية وتقولى وحشانى وتفهم عيونى لو مضايقة تقولى مش هاسيبك النهاردة الا لما اعرف فيكى ايه ولما تنده عليا بدلع تقولى دينا يا دينا محدش بيندهنى غيرها بكده ولا من خلود لما تسلم عليا وتضحك فى وشى وتميل براسها لجمب وماتحبش تشوفنى زعلانه وتقولى عشان خاطرى اضحكى وبابتسم عشانها رغم كل اللى فيا لمجرد ان فى حد بيفرح بضحكتك وانك فى مود حلو ولا من ايثار لما تبصلى وتقولى صباح الخير يا دينا وتطمن عليا وتقولى عاملة ايه النهاردة ومش هانسى نظرتها ليا فى اخر محاضرة وكانها بتقولى بحبك بجد ولا من شيماء لما تقولى ازيك يا دينا فينك يابنتى كنتى على النت طول الليل بتعملى ايه وتبصلى بعيون فيها لغز كبير نفسى افهمه واحساسها الكبير لما تقولى يا دينا بتوحشينى نفسى نقعد مع بعض ولا من هدى برقتها وجمالها وضحكتها ومن سلامها الرقيق وخوفها عليا ومن حكياتها عن يوسف اخوها ولا من سحر لما تشوفنى بلبس جديد تقولى حلو الطقم ده عليكى مع انى بلبسه على طول ولما نروح مع بعض بحكيلها عن حاجات كتييير عنى ولا علا عبد الله لما تسلم عليا وتقولى انا شوفت المدونة بتاعتك امبارح وبحس فيها انها تعبانة اوى من كتر شغل واقولها ربنا معاكى يا علا لانى بحس انها فعلا مجتهدة, مش هانسى مى كامل البنت الجريئة المتميزة اللى يمكن متكلمناش مع بعض كتير بس تقريبا عرفتها من اميرة جدا وحسيت انى اعرفها من كلام اميرة برضه مش هنسى مها وكلامها عن الموضة واللبس والذوق والاتكيت واللى عرفتها السنة دى بس للاسف, مش هانسى سارة الحداد وعقلها وقلبها الكبير, ولا انجى غزلان اللى عرفتها من خلال المشروع وقربنا جدا من بعض وحستنى اوى وسمعتنى فى يوم من الايام مش هانسى كلامها ونصحيتها ليا, مش هانسى الفت ولا سارة ايمن ولا اميرة محمود ولا اسماء خليل ولا أية موسى
مش متخيلة انى مش هاشوف زمايلى الولاد تانى اللى بجد عرفتهم من سنة بالظبط بس قربت منهم جدا على راسهم عمرو فهمى اللى حسيت انه انسان رائع بجد وشوفت جوانب انسانية صادقة اوى فيه ماكنتش اعرف عنه حاجة كنت بشوفه واحد عادى ملتزم و محترم واخلاقه عالية لما جمعنا المشروع عرفت عمرو الانسان الطيب المتميز وعرفت انه حنين اوى وراجل اوى مش متخيلة انى مش هاشوفه فى المدرج وهو بيضحك اوى وبيسلم عليا بوشه وايده بتشاور جمبه بالسلام بكلمة ازيك يا فندم مش هانسى كلامه معايا عن تفاصيل انسانية بحتة ..كمان مش هانسى ضحكة ايمن اللى عنيه بتقفل فيها وصوته بيعلى فيها وبيضحك من قلبه فعلا و كلمة ياالله لما يقولها هى و تمام وميه ميه وحركة كده بايده مش هانسى احمد عبد الحميد اللى عرفت واحد تانى خالص فى المشروع ومش هانسى انى اول مره اعرف ان احمد عصبى جدا مش هانسى مساء الخير بتاعته هى وكيفك اللى محدش بيقولها غيره ليا ولا محمد الششتاوى اللى كان اول ولد فى الكلية اكلمة واعرفه كنت فى سنة اولى وكنا بنتكلم هاندخل قسم ايه وساعتها قالى هاتدخلى اذاعة ازاى وحجابك بعدها الحمد لله تنبوءات محمد اصابت ودخلت صحافة عشان يجمعنا مشروع واحد فى سنة رابعة وماكنتش متخيلة ابدا ان انا ومحمد هانشتغل فى يوم مع بعض ولا محمد قرنه الشاعر اللى فوجئت انه فضل اعلام عن هندسة وانه بيكتب شعر جامد جدا ولما شوفت له قصيدة فى كتاب ليه مش هنساه برضه

صوابعى وهى بتكتب دلوقتى كل كلمة ودموعى نازلة على الكيبورد كانى بكتب جواب لكل حد كان معايا, لكل حد شاركنى الايام دى ولو بيوم واحد شوفته و سلمت عليه ..انا دلوقتى بكتبله وبقوله معرفتى بيك فرقت كتير معايا, وجودك فرق كتير معايا عايزة اقول ان فعلا كلكم غالين اوى عندى واسفة لو كنت ضايقت حد فيكم وعايزة اقول انى استافدت كتييير من كل واحد فيكم واتغيرت حاجات فيا كتير من كل حد فيكم

مع انى عارفه الكلام مش متناسق وانه كتير بس ده لانى بجد ماكنتش عارفة هاقول ايه وهاكتب ايه بس كله اللى عايزة اقوله بجد عمرى ما هنسى الايام دى, عمرى ما هانسى كل حد كان معايا فى الكلية كان معايا فى سنين مهمة جدا من حياتى
ماكنتش اعرف انهم هايعدوا بالسرعة دى وماكنتش عارفه انها هاتأثر فيا اوى كده ماكنتش عارفة انى هاعرفكم ووتكونوا بالمكانة دى عندى

عمرى مانزلت يوم للكلية وانا مضايقة كنت بحس انى نازلة عشان اشوف اصحابى اقعد معاهم احكيلهم عن يومى مع مين غيرهم هاضحك واهرج وهاكل فطير وبسكوت ونشرب شاى مع مين غيرهم هنسابق بعض احنا الخمسة او الستة فى كانز واحد مع مين غيرهم كنت هاقف فى السقا نصور ورق مع مين غيرهم كنت هاقعد فى المكتبة ونعمل الابحاث مع مين غيرهم كنت هاسيبهم فى الكلية وارجع اكلمهم على النت مع مين غريهم كنت هاحكى على كل اللى جوايا, مين غريهم كان هايسمعنى مين غيرهم كان هاتطلع معاهم لحظات الجنون مين غيرهم كنت هاعيش ايامى اللى فاتت, مين غيرهم كنت هاحبه الحب ده كله..مين غيرهم كنت احس بيهم كده ويحسونى كده

مفييش حد غيركم وعمرى ماهنساكم

كفاية كذب بقى

ايه اللى ممكن يخلى واحد يلجأ للكذب؟
ايه اللى ممكن يستفاده اى حد من الكذب؟
ليه وعشان ايه يكون الكذب حل لاى حد؟

انه يخبى الحقيقة لفترة؟
انه يتحاشى رد فعل هو شايف انه مش هايقدر يستحمله؟
انه هايتجنب صِدام هو مش هايقدر يواجه؟
انه شايف انه لما يكذب هو فى مصلحة اللى قصاده؟
انه يتحمل عواقب لوحده من غير ماحد يتحملها معاه؟

طيب ايه اللى ممكن يحصل لو الواحد كان صريح؟
ايه اللى ممكن يحصل لو كان صادق مع نفسه على الاقل؟
ايه ممكن يكون اسوأ من اللى هايحصل؟
ايه ممكن يصطدم بيه لو قال الحقيقة؟

اكيد هايفرق معاه
هاتفرق اللحظة دى
لحظة الصدق اللى هايعشها مع نفسه
لحظة تساوى عمره كله

لكن يعيش وقت كبير اوى فى كذبة
صعب اوى ..لا..ده قاتل اوى
قاتل للانسان ده قبل اى حد تانى
انه بيقتل نفسه كل دقيقة وبكل بطء
الدقايق بتعدى عليه سنين
عايش بروح كاذبة

مع ان وجوده فى الدنيا ده اكبر حقيقة

عايش بقناع
قناع كاذب دايما لابسه

فى كلامه فى ابتسامته.. وحتى فى احساسه
بس هايجى يوم ويسقط فيه القناع
سواء عمل حسابه او لاء
اليوم اللى هاتسقط فيه كل الاقنعة
بيكون زى الكابوس فى عنيه


طيب ليه الكذب وايه الثمن؟
ليه ..هو مش هايعرف يقول ليه
لان مفيش مبرر للكذب الا العجز والخوف والضعف
الثمن.. وقت كبير اوى بيمر من غير لحظة صدق واحدة عاشها
الثمن.. بيدفعها ناس كتيير اوى وهو مش حاسس
الثمن.. انه بيغدر بناس وهو مش قادر يعمل حاجة
ناس ماشفش منهم الا الصدق
والحقيقة كانت حياتهم

بس عاشوا فى الكذبة معاه

...

الكذب هو اسوء او ابشع صفة ممكن تكون فى انسان
النفاق هو كذب
الخيانة هو كذب
الرياء هو كذب
الغدر هو كذب
الانانية هو كذب
خلف الوعد هو كذب

حاجات كتير فى حياتنا بنكذب فيها
ليه وايه السبب؟ لان ببساطة هى دى الطبيعية البشرية
نحن لست ملائكة الله على الارض
ولا ادعى بأنى الفتاة الصالحة التى لا تكذب
و ان لسانى لم ينطق كذبا ابدا
لا..

بس انا عمرى ما هكذب لو كانت كذبتى
هى ثمن بيدفعه ناس كتيير معايا
بيدفعوه من حياتهم عشانى

اما ان حد يكذب عليا
اهون عليا يجرحنى وهو صريح
على ان يكون رفيقى وهو كاذب

تاج..يا مسهل

التاج ده جالى من سلمى الشربينى اولا بشكرها عليه ثانيا بعتذرلها انى اتخرت فيه
اول ماجالى التاج فكرت فيه اللى هو ياترى هاكتب ايه عنى, طبعا من الاصعب الاشياء انك تكتب حاجه عن نفسك فى نقط, فى ناس عندها القدرة دى بس المسالة عندى محتاجة تفكير شوية وعصر ذهنى عقبال ما اكتب كلمتين عنى عشان على الاقل مبخسش حق نفسى او امجد فى نفسى لانى من الاخر مش بعرف اشوف نفسى

...
روحت اللى بيشوفونى بقى على طول, روحت لبابا قولتله قولى على خمس حاجات الناس متعرفهاش عنى,قالى انك حساسة اوى(ده طبعا على غرار خناقة بينى وبينه وعيطت بسببها قالى انت بتخدى الكلام على نفسك بطريقة غريبة) قولتله لا قديمة هات غيرها, قالى اقتصادية بحتة قولتله مش هايهمهم يعرفوا عنى الموضوع مش هافتح شركة انا يا بابا ,قالى خلاص اكتبى انك بتحبى التصوير, قولتله يابابا امة لا اله الا الله عارفة الموضوع ده, المهم بعد ما يئست روحت لمحمد اخويا قولتله محمدقولى على خمس حاجات قالى بقولك ايه اكتبى مقاس رجلك الناس ماتعرفش عنه حاجه, قولتله خلاص هافكر فى الموضوع ده, قالى يعنى هاتكتبى عن الملكة اليزابيث مالك متحيرة كده ليه؟, قولت خلاص انا بقى هاكتب اللى انا شيفاه وزى مايطلع يطلع يالا ادى خمس حاجات محدش يعرفها طلعت تعرفها مش مشكلة اعمل نفسك اندهشت يااااه معقولة كده يعنى

1-كان كل حلمى واقصى امنياتى وانا صغيرة ان يكون عندى بيت صغير على البحر ومعايا فارس احلامى ودى تبقى الدنيا كلها بالنسبة ليا, واجيب اولاد كتيير اوى 7 ولاد مثلا وبنتين ولا حاجه, وطبعا يكون عندنا حصان عشان نتمشى عليه على البحر وعندنا قطة, الجميل بقى ان الحلم متغيرش كتير على فكرة مازالت الفكرة قائمة

2-اكلتى المفضلة بطاطس محمرة بالكاتشب, ممكن اكمل حياتى على الاكلة دى معرفش ليه, فى اى حتة تلاقينى اطلبها, ومن اصعب الاكلات ليا السمك معرفش اكله بس طبعا مع بابا لازم اكله معندوش هو الدلع ده

3-يمكن دى محدش كتير يعرفها عنى وهى انى عندى فوبيا الاماكن الضيقة, مش بقدر استحملها وممكن اتعصب واتنرفز على اى حد قدامى لمجرد ان المكان ضيق وزحمة, وممكن ابدا اضرب عشان ابعد الناس عنى,او الاستسلام تماما وتيجى حالة الاغماء العادية, طبعا الحالة دى بعيشها فى رحلة العذاب فى المترو بس بحاول انى مركبهوش كتيير عشان كده بحب الانطلاق ومكنش مقيدة بمكان او انى اتحبس فيه

4-من الحاجات برضه اللى انا نفسى ماكنتش اعرفها عن نفسى انى مش بخاف حاجات وبخاف من غيرها, الخوف عامة مش بحب اعيشه,مش بخاف مثلا من الفيران, ولا من الكلاب فى الشارع, ولا حتى الظلمة ولا الافلام المرعبة ولامن يوم الامتحان, ولا من اى حاجه مادية, لكن بخاف من حد يقول حاجه عليا من ورايا, اخاف من رد فعل معين, اخاف من بكرة, اخاف من الفراق, اخاف من طفل بيعط خصوصا لو صغير اوى اللى هو اعملك ايه وممكن اعيط جمبه, بخاف من يوم الحساب

5-بحب لعبة البلياردو اوى ويمكن انا ماليش فى الالعاب عامة بس من احلى الالعاب الى لعبتها فى حياتى وحبتها و اتعملتها بسرعة وبقيت اغلب فيها اللى علمنى كمان, بس كنت بكسبهم قهر.. عشان بس مازعلش, واللعبه دى مرتبطة عندى بمطروح مكانى التانى,فعلا من احلى الاماكن اللى بحبها جدا ودلوقتى نفسى بس اقعد على بحرها,بحب فى البلد دى كل حاجه اهلها وشوارعها ريحة جوها بحرها كل حاجه, حاليا دلوقتى معرفش هى اللعبة بتتلعب ازاى اصلا لانى بقالى اربع سنين مجتش جمبها من ساعة ما دخلت كليتى العزيزة كلية إعلام

وبس كده

بمرر التاج ده ل سلمى و محمد عبد العاطى و مروة و علا عبد الله ومحمد قرنة