اخيرا عملت البلوج

اخيرا وبعد طول انتظار وطول تردد..فعلتها نعم فعلتها

و زى ما بشوف فى كل افتتاحية لاى بلوج..يعلن صاحب كل مدونة ( اللى هو البلوجر يعنى) عن اللحظة الحاسمة التى قرر فيها ان يقوم بمثل هذه الخطوه .. وانه بعد طول انتظار ومحايلات وتوسلات من الاقارب والاقران قرر انه ينعم علينا وعليهم بالبلوج بتاعه.. وانه بقى اوعى هايكتب اللى ماتكتبش

انا كمان قررت اعمل مدونة او زى ما بيسموه بلوج ( اشمعنى انا يعنى) ماهو كله عمله.. وكمان مسايرة للتيار وانى بجارى التطورات قولت اعمله يمكن ابقى بلوجر قد الدنيا ولا حاجه مين عارف ؟!؟!

بس حلو اسم بلوجر ده..مش عارفة مدينى إيحاء تانى لما اسمعه يمكن بورجر ولا حاجه.. ما علينا
انا بصراحة فى الاول كنت مستغربة اوى للموضوع ده ..يعنى ايه اكتب كل حاجه عنى واعرض بقى كتاباتى ( على اعتبار قال ايه يعنى انى بكتب) على النت وانشر الخواطر بتاعتى اللى هى اصلا اللى فى البيت معايا ميعرفوش عنها حاجه..واكتب افكارى واى حد يشوفها والكل عادى يقراها !!!!

لاء والجميل بقى ان الموضوع مش كده وبس لا ده كمان حد يعلق على الكلام اللى انت كاتبه ويقول رأيه.. ازاى يعنى ؟؟ انا كنت شايفه دى حاجه فيها نسبه كبيرة اوى من الخصوصية.. وانه ماينفعش انى اعرض افكارى او حتى اى خاطرة على النت على العلن كده وحد يقراها..

بس عرفت ان اللى بياخد خطوة انه يعرض افكاره وتجاربه وذكرياته على بلوج خاص بيه ويدونها على النت..هو مدرك تماما ان فيه حد هايقراه وانه كمان هايعلق على كل حاجه..

اكتشفت ان الموضوع مش واقف انك بس بتعرض افكارك على المشاع والعلن لا ده انت بتشارك الناس فيها.. وعارف ان فى حد هايقيم افكارك دى..اتفقت معاه ام لم تتفق انت طرحت فكرتك للمناقشة او لمجرد انك عايز تطرحها وخلاص ..يعنى بتبقى المسأله عبارة عن مشاركة فى الافكار والتجارب والخبرات تقريبا كده بيبقى حوار عقول..وده اللى عجبنى فى الموضوع وشدنى ليه اوى..يمكن انك تقرب من الناس وتعرف هى بتفكر فى ايه وازاى بتعبر عن نفسها ده فى حد ذاته بيشدك

وكمان المسألة فيها قدر من الحرية و انك بتدى نفسك فرصة انك تتكلم وتعبر عن كل حاجه.. عن موقف حصلك تحكى عنه..فكره عايز تطرحها جت فى دماغك بدون اى سابق إنذار.. اغنية كلامتها عجبتك..شخصية انبهرت بيها.. مقوله أثرت فيك.. صورة ليها معنى من وجهة نظرك حبيت تتكلم عنها .. خاطرة او إلهام.. وخصوصا الخواطر اللى بتيجى وقت الامتحانات والمذاكرة دى.. بتبقى فى الجون..

المهم يعنى فى الاخر اكتشفت ان الحوار ده جامد.. ترقبوا بلوجى بقى ..والله الموفق