يوم ولا اروع

كان يوم جميل جدا..يوم مالوش حل من الاخر
كنت مستنياه بفارغ الصبر..ومش انا بس ..كلنا كنا مستنيينه
لان الواحد بجد اعصابه تعبت جدا من الامتحانات ومن الالتزامات اللى علينا
طبعا انا بتكلم عليا وعلى البنات اصحابى فى الكلية (الفرقة الضاربة) كنا بنفكر فى اليوم ده تقريبا من حوالى شهر قبل ما الامتحانات تبدأ اصلا.. كان نفسنا فى يوم يجمعنا اوى مع بعض ..ننسى شوية فيه جو الكلية..وجو المذاكرة والمحاضرات .. اى نعم احنا مش من النوع اللى بنموت نفسنا فى المذاكره اوى..ده هو يدوب كان قبل الامتحان بكام يوم بدانا نلم نفسنا ..بس عامة كنا بقلنا كتير ما خرجناش مع بعض ولا روحنا فى اى حته خارج نطاق الكلية
والحمد لله حددنا المكان والزمان ..واتفقنا على الميعاد.. وطبعا كعادة اى خروجة تيجى واحدة تقولك معلش مش هاقدر اجى حصل ظروف خارجة عن إرادتى وما عليك غير انك تقول طيب براحتك وهى ترد بعفوية وتلقائية معهودة تتعوض ان شاء الله ...بس فى ناس فعلا كنت اتمنى انهم يكونوامعانا .. كان اليوم هايكمل بيهم
المهم اتفقنا على الميعاد والتزمنا بيه وكل واحده بدأت تلم العدة بتاعتها واتجمعنا عشان نجيب الفطار مع بعض..وبعدها وصلنا كلنا لنقطة التجمع اللى هى مكان الرحلة..المكان ده انا فى رأيى بجد خيالى, مكان ولا اروع, المكان ده هوالازهر بارك..حاجه كده هاديه جدا..اول ماتدخل هتلاقى اول حاجه تقابلك نفورات المياه... الخضرة والزرع فى اى مكان عينك تقع عليه ...والجو المشمس.. ده غيرطبعا المنظر اللى بتشوفه لما تدخل الجنينه من جوا هتشوف القاهره من فوق ومناظر البيوت والشوارع والجوامع ..و القلعه قدامك ومآذن جامعى السلطان حسن والرفاعى ..ده لان الجنينة على هضبة فا هى مرتفعة عن باقى الاحياء اللى حواليها وبتشوف كل حاجه من فوقها..وفيه جو معين بتحس بيه ..لان الجننيه معموله على طراز الفن الاسلامى المعمارى.. والاجمل ان فيه بحيرة صناعية جوا الجنينة بتدى روح اجمل للمكان..اخترنا منطقة البحيرة وقعدنا انا والبنات عندها..
قضينا وقت من اجمل الاوقات.. بجد مكان زى ده ووقت انت فعلا محتاجه اوى بعد ضغط ذهنى وعصبى ونفسيتك كانت فى النازل لاسباب كتير...ومع اصحابك اللى بتحبهم .. .. اكيد هاتفرق معاك اوى, لانها حاجة كانت جاية فى وقتها وبجد احساسك مش هاتقدر توصفه...المشكلة مش فى المكان وقد ايه هو جميل..المشكلة انت فى المكان ده مع مين؟..واللى انت معاهم دول بيخلوك حاسس بأيه؟..هو ده الاهم
وبعترف ان من غير البنات اصحابى دول انا ماكنتش هابقى كده..ماكنتش هلاقى اللى ينسينى همومى, ماكنتش هاحس ان فى حاجة ممكن تخلينى احس ان اى ضغط او تعب مالوش قيمة لو بقيت معاهم
الوقت معاهم بيبقى حاجة تانية .. وانا نفسى بكون حاجة تانية..خصوصا اليوم ده كنا عاملين زى الاطفال بجد هيصنا وطلعنا كل اللى جوانا ..كأنك جبت طفل وحطيته فى جنينة كبيرة وقولتله اجرى..احنا مش بس جرينا ده احنا انطلقنا..طبعا سجلنا كل اللحظات دى..بالصوت والصورة.. يارب نفضل مع بعض كده على طول...ونقضى مع بعض احلى ايام عمرنا...واحب اقول لكل واحده كانت معايا فى اليوم ده بجد بحبك اوى..وبقول لصحابى كلهم انتوا فرقتوا معايا اوى فى حياتى