مش عارفة اقول ايه ولا ابدأ بايه
عامة دى صورة غلاف المجلة
مشروع التخرج بتاعنا
والحمد لله اخدنا مركز تانى
وكنت هاكتب العنوان عذرا مجلتى
لانى ماتكلمتش عنها ومديتهاش حقها
بس اعتقد ان زمايلى ادوها الحق وزيادة
يمكن سجلوا كل حاجة
كتبوا عن الفكرة وعن المجهود اللى اتعمل فيها
وانا مش هاضيف جديد عن اللى قالوه
ده حتى لحظة اعلان النتيجة
لحظة ما اخدنا مركز تانى
دى كمان نزلت على بلوجات زمايلى
بس الفترة اللى فاتت دى
حاسة كانى ماكنتش فى كامل وعى
تقريبا كأنى فى غيبوبة
لسه مفوقتش من الصدمة او الفرحة
وغير كده
حاسة ان الكلام عاجز انه يعبر عن اللى جاويا
فآثرت الصمت زى ما بيقولوا
بس ماقدرتش بقى
خلاص فوقت وقادرة اتكلم
عن احلى حاجة حصلتلى فى حياتى
كل اللى ممكن اقوله
ان المجلة دى على المستوى الشخصى
ليها معنى مختلف تماما عندى
ماكنتش مجرد مشروع بالنسبة لى
او مجرد مجلة وهتاخد مركز او مش هتاخد
كانت اكبر من كده بكتير
كانت حاجه اتجسدت فيها كل مشاعر
الامل والحلم والتعب والصبر والمثابرة واليقين والنجاح
يمكن حياتنا كلها بنمر فيها بمشاعر زى دى
بس انا عشت كل دول فى المجلة دى
حسييت وعرفت حاجات كتير
يمكن محتاجة عمر تانى عشان احسهم تانى
قربت من ناس واشتغلت معاهم
وجمعنا حلم واحد
وتقريبا ماكنش يجمعنى بيهم اى حاجه
مجرد ابتسامة من بعيد
بس بقينا نفكر بدماغ واحدة
بنحس بحاجة واحدة
حاجة واحدة جمعت 17 فرد
شالت كل الحواجز مابينا
كلنا بنسعى عشان نحقق هدف واحد
اول مرة احس انى داخل فريق زى كده
اول مرة مافكرش فى تعبى انا بس لا فى تعب غيرى
لاول مرة بفكر انى اعمل كل اللى اقدر عليه
عشان ماخذلش غيرى اللى تعب
وحط ثقته فيا
وبجد انا فخورة بكل واحد
اشتغلت معاه واحتكيت بيه من المجموعة
وبقولهم بيكم عرفت معنى الصبر
ومعاكم شفت الحلم حقيقة
ولولاكم ماكنتش حسيت بطعم النجاح
النجاح اللى بهديه لاكتر ناس تعبوا معايا
واستحملونى كتير و كان بيشجعونى دايما
كانوا مصدر الهامى
ومن غيرهم ماكنتش هاقدر
ادى اى حاجة للمجلة دى
يمكن قصرت فى حقهم كتير
بس برغم كده دايما كانوا واقفين جمبى
والدى ووالدتى
ليكم بهديكم الفوز الغالى ده
واللى خلانى احس فعلا انى عملت حاجه تفتخروا بيها
لما شوفت دموع الفرح فى عنيكم
دى كانت عندى بالدنيا كلها
الحمد لله
مش هانسى ابارك لمجموعة
اللى خدوا المركز الاول وكانوا يستحقوه
بجد بحترمهم وبحترم شغلهم
مبروك عليكم وعلينا الفوز
ملحوظة : فى اهداء خاص جدا لمحمد وهبه هاينزل فى بوست تانى ان شاء الله
روابط اخرى عن المجلة
لحظة الفوز
لحظة الفوز
20 comments:
مشاعرك جميلة جداً وانتي بتتكلمي عن حلمك وعن اصحابك
وعن والدك ووالدتك
ربنا يخليكي ليهم وتفرحهيم دايماً ..
مشرعكم تجربة صحفية ناجة جمع اهداف نبياه ومشاعر انستنية وصداقه واخوه ساهمت كتير في انجاح المشروع بالصورة الرائعة دي
ربنا يوفقك دايما يا دينا ويجعل في كل اعمالك لحظة فوز تسعدك وتسعد كل الناس القريبين منك :)
ألف مبروك يا دينا، مبروووووووووك ليك ولكل المجموعة ومبروك لكتب خانة
أعتقد أن اللى أنت قلتيه ده والروح اللى كانت فى المجموعة هى أهم حاجة، وهى اللى خلت مشروعكم يخرج فى الصورة ده، أهم حاجة فعلا إن الناس لما تشتغل مع بعض تبقى حاسة ببعض ومقدرة بعض أوى، ويبقى الهدف واحد والحلم واحد زى ما قلتى، وأعتقد كمان إن مكسبك الحقيقى هو المجموعة نفسها مش المركز التانى، ربنا يكرمكم ويوفقكم
سلامو عليكو الف الف الف مبروك يا برنس يا زعيم يا عظيم انتى انسانه محترمه جدااا وتستاهلى كل خير وانا كنت شايف الجهد الكبير والعمل الدءوب الى كنتى بتقومى بيه وقعادك على النت ليلا نهارا ومشاعرك جميله جدا والنجاح الجماعى ده فعلا شىء رائع وبالتوفيق يا دينا
الف مبروك يا دودىىىىىىىىىىىى
الف مبروك على التخرج
الف مبروك على المجله
الف مبروك على رجوعك لمحبيكى من القراء المتابعين للمدونه
يااااارب دايما حياتك كلها تكون من نجاح لنجاح
الف مبروك يا دندووون
لو الكلام كان يقدر يعبر عن مشاعرى يا دينا لحظة إعلان النتيجه كنت أفضل اتكلم لحد السنه الجايه.
بس كل اللى اقدر اقلهولك ان عمرى ما فى حياتى فرحت كده.
و أنا كنت متوقعه من اول لحظه و من اول يوم ابتديتى فى فى المجله ان انتى ان شاء الله هاتعملى حاجه و حاجه جامده كمان.
و اللى بقلهولك دلوقتى ميرسى على الفرحه اللى دخلتيها علينا بالنسبه ليا و لبابا و لماما و حماده و رنا
فرحه بجد ما بعديها فرحه و فعلا ما تتوصفش .....
و لحظتها ماكنتش فعلا قادره اتكلم غير بدموعى و بدموع قريبنا اللى كانوا موجودين ساعه النتيجه .
ألف ألف مبروك يا دينا و انا عارفه ان المجله ده هى فقط البدايه
و عارفه و على يقين ان الجاى اجمد من كده ان شاء الله
و يارب من نجاح إلى نجاح.
و مبروك لكل واحد شارك فى المجله و اولهم طبعا عائشة اللى عمرى ماكنت اعرف ان دمها زى العسل كده و مبروك طبعا لسلمى و لعمرو و اميرة و شيشتاوى و إيثار و الباقى بقى يعذرونى عشان مش فاكرة اساميهم بس انا على يقين انهم عملوا مجهود جبار .
ربنا يوفقك يا دينا و كل اصحابك اللى فعلا حبتهم و قربت منهم قوى و حبيتهم عشان فعلا حبوكى بجد.
LIFE WITHOUT FRIENDSHIP LIKE THE SKY WITHOUT SUN.
ألف مبروك على المشروع الجميل ده
جميل قوي إحساس المجموعة ده
وروح الفريق كمان دا احساس رائع وجميل
إلى الأمام دوما
محمد:
ربنا يكرمك
زى ماقولت المشروع جمع مشاعر انسانية زى ما جمع مجهود وتعب يمكن انا حتى حستها اوى وده اللى خلانى ادى فى المشروع كده
ربنا يباركلك يا محمد
وسعيدة بوجودك دايما معانا
شيماء:
الله يبارك فيكى يا شوشو
فعلا يا شيماء كلنا كنا عايزين نوصل لهدف واحد وحلمنا كان واحد وحققناه الحمد لله
انا كسيت كتييييييير مش مركز تانى بس
تسلميلى يا شوشو
عمرو الببلاوى
الله يبارك فيك يا فندم
وسعيدة جدا جدا بتعليقك وبزيارتك دايما للمدونة
وزى ما قولت كل حاجه كانت قدامك والحمد لله اخر التعب جيه بفايدة
منور يا عمرو
هدى:
الله يبارك فيكى يا دودو
انا عارفة انى بقالى كتير مش باجى جمب المدونة بس ان شاء الله هاهتم بيها بس انتى خليكى ورايا وفكرينى
منورانى دايما يا دودو
هبه:
مش عارفة ارد اقول ايه بس
اعتقد انك شوفتى ردى لما قريت التعليق وفرحتى بيه
مش هانسى وقوفك جمبى يا هبه ربنا يخليكى ليا دايما
مش هاكتب كتير هنا عشان لسه هاتكلم تانى عنك وعن محمد وقد ايه ساعدتونى
ربنا يخليكوا ليا دايما
صاحب المضيفة:
هو احساس اكثر من رائع والحمد لله ربنا وفقنى مع مجموعة من احسن الناس وكلهم كانوا متميزين ومش هاقول تانى انى فخورة بيهم
اسعدتنى بتعليقك وبالزيارة
و اتمنى ماتكنش اخر زيارة
يااه يا دينا كل الكلام اللى قولتيه صح، المجلة دى عكست حلم 17 واحد، عكست مشاعر جميلة و كفاح و مثابرة و صبر و فرح فى أوقات و ضغط فى أوقات
ناس قالولى مشروع ايه اللى تدى فيه مجهودك، بس إحنا لينا فكرتنا و لينا هدفنا اللى سعيناله و ديه أحلى بداية ممكن نبدأها لنفسنا
المهم انا سعيدة جدا انى عرفت ناس زى اللى معانا فى المشروع و قربت منهم و كسبت معرفتهم
سعيدة أوى أوى بكل مشروع معانا و بناس ماخدوش مركز بس فرحتهم كانت أكتر من أى مركز ممكن ياخدوه و هما غنيين عن التعريف
شكر تانى ليوثينك كلها بمواضيعها بمحررينها بمصورتها العظيمة بكل الناس اللى شاركو فيها
لو كانت شايفك وانتى بتكتبى كنت هقول ان الفرحه باينه اوى ف عنيكى انا حاسس ان من كتر المشاعر اللى جواكى وانتى بتكتبى البوست دا الدموع كانت بتنزل
ربنا يوفقكم
يا ريت تبقى المجله جسر للتعبير عن هويتنا وتصحيح الاراء اللى الغرب واخدها عنا
الغلاف تحفه
ربنا معاكوا ويجعلوا فى سبيل الخير
:D
الحمد لله
يرحمكم الله يا عمرو
سلمى:
اضيف لكلامك كمان يا سلمى انى انا كمان سعيدة بمشروعات تانية عملت شغل كويس ولانى مؤمنة بالناس دى فا توقع ليهم مستقبل باهر ان شاء الله
ربنا يوفق الجميع
حزين:
يعنى انا مشكلتى ان لما بكتب حاجة بكون حساها اوى ناهيك انى اصلا فى حاجات بتأثر فيا لوحدها مبالك بقى المشروع والمجلة اللى عشات فيهم احلى ايام حياتى مع احسن ناس قابلتهم
ميرسى على تعليقك وزيارتك
واتمنى انك تنورنى على طول
عمرو:
..........................
..........................
..........................
ترقب الرد
محمد:
ههههههههههههه
لا عمرو ممكن يقول كلمة تعنى الكثير
ويجيب من الاخر والمفيد
طبعا الحمد لله
ماشاء الله يا دينا كلماتك جميله
الف الف مبروك على المركز وعقباااااااااااال النتيجه النهائيه ان شاء الله
من نجاح لنجاح با ستمرار ان شاء الله:)
س ا ر ة
مبروك المركز التاني
و قريبا نتمنى نشوف مجلتكم في الحياه بالمركز الاول دايما
وطبعا مافيش بعد روح الجماعة
احساس جميل يارب يدوم عليكو
السلام عليكم
سألت سؤال فى المدونه عندى ويهمنى جدا اعرف رأى المدونين و ازاى هيجوبوه
عسى ان تعم الافاده
.
.
.
الدعوه عامه
سارة:
ميرسى يا سارة ربنا يخليكى انتى اجمل بجد
ويارب كلنا نقدر نحقق النجاح اللى بنتمناه دايما
Dr-Killer:
حمد لله على السلامه فينك
على العموم انا سعيدة بزيارتك وبتعليقك وربنا ويوفق الجميع وميرسى
بجد على تعليقك اللى اسعدنى جدا
حراس الحقيقة:
اوك هاخلص اللى فى ايدى وجرى اشوف السؤال ده
بس انتى ابقى تعالى عندنا من وقت للتانى كده :)
المجلة مش محتاجه كلام لانها جميلة جدا و اشتغلتم فيها اكتر من غيركم الصراحه عجباني جدا اللهو الخفي
اللهو الخفى:
ربنا يكرمك يا مصطفى
ومبسوطة انها عجبتك
ميرسى يا فندم
Post a Comment