Monday, April 23, 2007

تاج..يا مسهل

التاج ده جالى من سلمى الشربينى اولا بشكرها عليه ثانيا بعتذرلها انى اتخرت فيه
اول ماجالى التاج فكرت فيه اللى هو ياترى هاكتب ايه عنى, طبعا من الاصعب الاشياء انك تكتب حاجه عن نفسك فى نقط, فى ناس عندها القدرة دى بس المسالة عندى محتاجة تفكير شوية وعصر ذهنى عقبال ما اكتب كلمتين عنى عشان على الاقل مبخسش حق نفسى او امجد فى نفسى لانى من الاخر مش بعرف اشوف نفسى
...
روحت اللى بيشوفونى بقى على طول, روحت لبابا قولتله قولى على خمس حاجات الناس متعرفهاش عنى,قالى انك حساسة اوى(ده طبعا على غرار خناقة بينى وبينه وعيطت بسببها قالى انت بتخدى الكلام على نفسك بطريقة غريبة) قولتله لا قديمة هات غيرها, قالى اقتصادية بحتة قولتله
مش هايهمهم يعرفوا عنى الموضوع مش هافتح شركة انا يا بابا ,قالى خلاص اكتبى انك بتحبى التصوير, قولتله يابابا امة لا اله الا الله عارفة الموضوع ده, المهم بعد ما يئست روحت لمحمد اخويا قولتله محمدقولى على خمس حاجات قالى بقولك ايه اكتبى مقاس رجلك الناس ماتعرفش عنه حاجه, قولتله خلاص هافكر فى الموضوع ده, قالى يعنى هاتكتبى عن الملكة اليزابيث مالك متحيرة كده ليه؟, قولت خلاص انا بقى هاكتب اللى انا شيفاه وزى مايطلع يطلع يالا ادى خمس حاجات محدش يعرفها طلعت تعرفها مش مشكلة اعمل نفسك اندهشت يااااه معقولة كده يعنى


1-كان كل حلمى واقصى امنياتى وانا صغيرة ان يكون عندى بيت صغير على البحر ومعايا فارس احلامى ودى تبقى الدنيا كلها بالنسبة ليا, واجيب اولاد كتيير اوى 7 ولاد مثلا وبنتين ولا حاجه, وطبعا يكون عندنا حصان عشان نتمشى عليه على البحر وعندنا قطة, الجميل بقى ان الحلم متغيرش كتير على فكرة مازالت الفكرة قائمة


2-اكلتى المفضلة بطاطس محمرة بالكاتشب, ممكن اكمل حياتى على الاكلة دى معرفش ليه, فى اى حتة تلاقينى اطلبها, ومن اصعب الاكلات ليا السمك معرفش اكله بس طبعا مع بابا لازم اكله معندوش هو الدلع ده

3-يمكن دى محدش كتير يعرفها عنى وهى انى عندى فوبيا الاماكن الضيقة, مش بقدر استحملها وممكن اتعصب واتنرفز على اى حد قدامى لمجرد ان المكان ضيق وزحمة, وممكن ابدا اضرب عشان ابعد الناس عنى,او الاستسلام تماما وتيجى حالة الاغماء العادية, طبعا الحالة دى بعيشها فى رحلة العذاب فى المترو بس بحاول انى مركبهوش كتيير عشان كده بحب الانطلاق ومكنش مقيدة بمكان او انى اتحبس فيه


4-من الحاجات برضه اللى انا نفسى ماكنتش اعرفها عن نفسى انى مش بخاف حاجات وبخاف من غيرها, الخوف عامة مش بحب اعيشه,مش بخاف مثلا من الفيران, ولا من الكلاب فى الشارع, ولا حتى الظلمة ولا الافلام المرعبة ولامن يوم الامتحان, ولا من اى حاجه مادية, لكن بخاف من حد يقول حاجه عليا من ورايا, اخاف من رد فعل معين, اخاف من بكرة, اخاف من الفراق, اخاف من طفل بيعط خصوصا لو صغير اوى اللى هو اعملك ايه وممكن اعيط جمبه, بخاف من يوم الحساب


5-بحب لعبة البلياردو اوى ويمكن انا ماليش فى الالعاب عامة بس من احلى الالعاب الى لعبتها فى حياتى وحبتها و اتعملتها بسرعة وبقيت اغلب فيها اللى علمنى كمان, بس كنت بكسبهم قهر.. عشان بس مازعلش, واللعبه دى مرتبطة عندى بمطروح مكانى التانى,فعلا من احلى الاماكن اللى بحبها جدا ودلوقتى نفسى بس اقعد على بحرها,بحب فى البلد دى كل حاجه اهلها وشوارعها ريحة جوها بحرها كل حاجه, حاليا دلوقتى معرفش هى اللعبة بتتلعب ازاى اصلا لانى بقالى اربع سنين مجتش جمبها من ساعة ما دخلت كليتى العزيزة كلية إعلام

وبس كده

Friday, April 20, 2007

إهداء لهم

سمعت اغنية لمحمد منير..بصراحة شدتنى اوى..فكرت فى كل حد كان واقف جمبى فى اى محنة كنت فيها..الكلمات لمستنى اوى..برغم انها قصيرة جدا وبسيطة جدا..الا ان معناها كبير اوى عندى فقررت اكتب إهداء

إهداء لكل شخص فى حياتى
انصت لشكواى..وسمع انينى..بين يديه ارتاحت دموعى..رغم احزانه .. رغم آلامه.. وجدت صدره رحبا لى.. حمل احزانى وشاركنى همومى..ساعدنى ولو بإبتسامة


اهداء لكل هؤلاء
اهداء لمن هم بالفعل نعمة منحها الله لى, ليهون عليّ كل إبتلاء, فبهم استعيد ثقتى واستمد قوتى , احمد الله عليهم..واشكرهم لوجودهم فى وقت احتجت كثيرا لهم



بننجرح كل يوم لكن
لكن بيفرحنا ان انت جوا القلب ساكن
ساكن فى افراحنا
وانت الامل فى العيون

والنشوة ساعة الجنون
وإياك تكون زيهم

تروح وتجرحنا
ده انت الوحيد منهم تقدر تريحنا


بننجرح..محمد منير


Thursday, April 12, 2007

امبارح كان عمرى عشرين

زى كل سنة
رسالة فى نفس الوقت
كل سنةوانتى طيبه يا دندون
وعقبال مية سنة
من كام سنة كانت فى التليفون
دلوقتى بقت رسالة فى موبايل
الحمد لله لسه حد فاكرنى وبعتلى رسالة
زى كل سنة
بقى زى الواجب
حد يرميلك الكلمه
عمل اللى عليه برضه
و زى كل سنة
تحصل مشاكل فى اليوم ده بالذات
مع البيت ومع اصحابى
عادى
اصبح مشهد معتاد
مش عارفه ليه مش مضايقة
ناس كتيركنت متوقعه انها تفتكرنىاليوم ده بس
وبرضه مافتكرتنيش
ناس كتير قالت الكلمة
وياريتها ما قالتها
ناس الكلمة بتيجى بعد فوات الاوان
بس بقول كتر خيرهم
على الاقل افتكروا
المهم انى حاسة اليوم ده
وهافضل احس انه احلى يوم فى عمرى
وهافضل احلم انى اكون افضل
فى السنة اللى بعدها
هافضل استنى دينا احسن فى السنة اللى بعدها
بغض النظر عن الناس اللى اكيد بيضفوا احساس جديد على اليوم
الا انى مش مستنياه
يكفينى انى بعيشه باحساسى انا
عدت 21 سنة فى وجودى فى الدنيا
سنين لغاية دلوقتى انا راضية عنها

تاجات متأخرة


خلال تصفحى للمدونات الاخرى كنوع من معرفة الجو العام فى المدونات التانية ماشية ازاى والناس بتقول ايه والنظام ايه لاقيت فى ضمن الكلام حاجه اسمها تاج
تاج ايه ده ..وليه يعنى اسمه تاج.. وسئلت نفسى هو بيجيلهم ازاى.. يعنى اول ما بيفتح البلوج بتاعه بيلاقى رساله بتقول جالك تاج.. بجد والله ..كنت فاكره انه زى اميل بيتبعت.. ومش هاعرفه الا لما يكون عندى بلوج
وعملت البلوج وشاء القدر ان اعرف التاج بيجى ازاى (الحمد لله ربنا محرمنيش من حاجه) وجالى تاجيين مش تاج واحد كمان.. ولاقيته عبارة عن ترشيح من احد اصدقائك المدونين وبيمرر التاج ده لك..اى كان نوعه والاسئلة المطروحة فيه.. وانت بتقوم بإعادة نشرها وانت بتجاوب على الاسئلة الى جانب انه الدور يأتى عليك لتمرره لاخرون وهكذا ..طلع الموضوع بسيط اوى
وبما ان التاج متوقف عليك انت..يعنى اولا لازم تكون متابع كويس لمدونات اصدقائك عشان تعرف الموضوع ده ..ثانيا اول ما تشوفه حاول تكتبه لانه مايصحش صراحه حد يبعتهولك ومتعبرهوش
جينا بقى لاهم نقطة ..الا وهى انى المفروض عليا تاجين متاخرين ..والمفروض انى بلقح على نفسى بالكلام من الاخر
ايوا انا عندى تاجيين متاخريين وده نظرا للظروف الصعبة اللى بمر بيها من امتحانات وكلية ومشروع تخرج ..وطبعا مش مبرر رئيسى..بس ده الى جانب انى بقت كتباتى قليلة اوى الفترة دى على البلوج..وبقت عندى حالة خمول من ناحية الكتابة
يمكن لان فى حاجات كتير بتحصل وورا بعض مابقاش عندى قدرة على التسجيل والكتابة فى الوقت الحالى.. بمصطلح اعم( انا فايقة لايه ولا ايه)..فا كويس اوى انى ادخل على بلوجات اصحابى واكتفى بالتعليق على اللى عجبنى (عشان الواحد يحس انه لسه موجود).. بالرغم ان فيه حاجات كتير اوى بتعجبنى .. اعتقد ان الجو ده عام وعند ناس كتير مش عندى انا بس
ما علينا..المفروض انى عندى تاج من زقزوق ومن سلمى الشربينى

بقولهم متيأسوش.. اكيد فى يوم من الايام هاعمل التاجات دى
لا بجد والله هحاول انى اعملها فى اقرب وقت.. بس محدش يفتكر انى منفضة ولا حاجه