ده بجد؟؟

جاتلى الصورة دى فى اميل, بصراحة تستحق ان احنا نقف عندها شوية, ونسئل السؤال الطبيعى بضحكة مليانة استغراب

هو حصل ايه فى الدنيا

ندا

ندا دى بنت ابن عمى
اخر مرة شوفتها كانت صغيرة فى تانية اعدادى ولا حاجة
حاجة كده صغيرة اوى..دلوقتى بقت حاجة تانية.. سبحان الله الزمن بيعدى بسرعة اوى
كانت فيه مناسبة قريبة جمعتنا
وبالصدفة لاقيت ندى فى المناسبة دى
كنت متوقعة انى هاسلم على البنوتة الصغيرة
وامسح بايدى على شعرها ..لانها ماشاء الله كانت من الاطفال اللى فعلا يتقالوا عليهم زى القمر هى واخواتها
بس اتفاجئت ببنوتة كبيرة انسة كده, هى حجمها صغير مش كبير, بس تحس بانسة محجبة وقربت تجيب طولى وبقت فى سنة تالتة ثانوى دلوقتى ..بجد انبسطت بيها اوى
ندا قاعدة فى مطروح,, وكانت جاية القاهرة اسبوعين وماشية فاوعدتها بخروجة فى القاهرة
خرجت معاها,, حسيت بحاجات كتير كنت قربت انساها
الطفولة والضحكة الصافية والرقة والهدوء
حسيت فى ندا زى الوردة اللى لسه متفتحتش
لسه وردة مقفولة.. جمالها زى ماهو نقى.. عايشة لسه فترة البراءة
لا اتعاملت مع ناس وحشة ولا فكرها بقى وحش
ظنونها وتفكيرها عن الحياة لسه متلوثش
بمعنى اصح لسه شايفة الحياة حلوة لسه قلبها فرحان
تفكيرها بسيط اوى..معطياتها عن الحياة ابسط مما تتخيل
تعليقاتها عن اى حاجة بتشوفها تعليق عفوى وتلقائى
لا فيه نرفزة ولا فيه زعيق ولا شتيمة.. لما تشوف اى حاجة غريبة تقابلها بضحكة
تبتسم وتبص بعيون مستغربة,, تحاول تستوعب ده معناه ايه وده ليه وتفضل تسئل بفضول
هى كانت اللى بتسالنى وبجاوب عليها بس فى الحقيقة هى اللى كانت بتجاوب على حاجات كتير عندى من غير ما تحس ... انا كنت معاها كأنى بتعلم منها بجد
خلتنى افكر ان احنا كبرنا نفسنا بسرعة, بنتشكى كتيير,,بنشوف الحاجة الوحشة قبل الحلوة,,
وشنا فيه عبوس غريب.. اتعودنا على التكشيرة او حتى السرحان
عيوننا بقت فيها نظرة توهان مرسومة..ماشيين و مستنين نقع فى اى لحظة
بقينا عاملين زى الآلات ماشيين فى سير بنعمل حاجة ونخلصها عشان نعمل حاجة تانية
حتى مابنفكرش نتأمل اى حاجة, و لو فكرنا نتأمل ونسرح لازم نفكر فى حاجة تعبانا او وجعانا
بقينا نعّقد كل حاجة..كل حاجة.. حتى الامنيات,, بقينا نعقدها وبنتمنى حاجات صعبة المنال وبنفضل كل يوم نمّنى نفسنا بيها
اما ندا فا كانت امنياتها بسيطة جداااا كانت كل امنياتها تخرج فى يوم وتتفسح
نفسها تزور منطقة معينة..وتحس انها امنية هى متمسكة بيهاا اوى وطبعا ممكن تتحقق وبسهولة ممكن تفرحها
ياااااه يا ندا للدرجة دى الحياة سهلة ,,امال انا كنت مصعباها ليه
امال انا كنت شيفاها وحشة ليه,,شوفتها بعنيكى حاجة تاينة شوفت الحياة بسيطة اوى شوفتها رقيقة اوى
يمكن الحياة ناشفة مع الناس الناشفة ورقيقة مع الناس الرقيقة ..مش عارفة
بتمنى من كل قلبى تفضل ندا كده على طول ماتتغيرش مع الوقت كالعادة
لانى معاها اتغيرت فيا حاجات كتيير
بقيت معاها اضحك وافرح ومفكرش فى الوقت ..كان هدفى انى اسعدها اليوم ده بس الحقيقة هى اللى خلتنى سعيدة عشان كده بجد بشكرها ,, شكرا يا ندا جيتى فى وقت كنت كتير محتجاه

اهى ضربت شقلباظ

قرب..جرب..قرب

هنا مش بنهرج

الدنيا بقت سيرك..واللى ما يشترى يتفرج

الدنيا دى فيها كام بلياتشو

الزمن لطشه قفاه حرقه بجاز

الزمن وعده قام صدق هتشه

واهى ضربت شقلباظ

الاغنية

اغنية لما سمعتها استغربت اوى..بس عجبتنى اوى فى نفس الوقت

كلمات جريئة وجديدة.. لما تسمعها اول مرة تنتبه ليها وتستنى الكوبليه يتعاد تانى عشان تركز فيها اكتر

عجبانى كلماتها جدا وخصوصا اخر جملة اهى ضربت شقلباظ

سماعى للاغنية لا يعنى بالضرورة انى اتفرجت على الفيلم بس اكيد تشدنى انى اتفرج عليه

خصوصا ان معنى الاغنية حلو وصوت مدحت صالح من اكتر الاصوات اللى بحب اسمعها ولان اختياره لاغانى الافلام والمسلسلات اللى بيعملها بيبقى اختيار موفق فى الغالب, واحيانا لما بعرف ان مدحت صالح هو اللى بيغنى اغنية فيلم معين ببقى شغوفة اوى اسمعه واشوف الفيلم عشان اعرف حدوتة الاغنية.
مدحت صالح ليه اغانى لافلام مختلفة, اكيد مش فاكراها كلها بس اللى فاكره منه دلوقتى اغنيته حبيبى يا عاشق لفيلم شورت وفانلة وكاب طبعا دى من الاغانى المفضلة ليا, غنى برضه النور مكانه فى القلوب لفيلم امير الظلام , دى بقى بحب اسمعها لما بكون مضايقة
ده غير اغنية تتر مسلسل عباس الابيض كانت من الاغانى الجميلة ليه وبرضه كلمات جريئة جدا وفيها سخرية جامدة قدر يغنيها مدحت صالح ببراعة وعلقت مع ناس كتير وعملت جماهيريه كبيرة للمسلسل, كلمات الاغنية لايمن بهجت قمر..عامة ممكن اتكلم عن اغانى الافلام والمسلسلات اللى عجبتنى وعلقت معايا فى بوست تانى لانهم كتيير اوى سواء لمدحت صالح او غيره..

اسيبكم مع الاغنية ..صحيح الكلمات دى برضه لايمن بهجت قمر

وليه الغلط ده؟

قاعدة لا بيا ولا عليا
ماما جاية تقولى الحقى ده انتوا بتتهزقوا
قولتلها نعم..مين اللى استجرا ده ولعب فى عداد عمره
قالتلى تعالى ياستى اهو اقرى
كان عمود لواحد اسمه هادى فهمى فى المصرى اليوم بتاريخ 10-8..اصلا الراجل ده اول مره اسمع عنه
المهم المدعى ده بيقول علينا فى العمود بتاعه فى سطر ونص
"كلية اعلام القاهرة تحتاج الى عميد وعمدة! معظم خريجى الكلية مستواهم...بلاش! المستقبل الإعلامى يظهر انه ليس لهؤلاء!"
لو انت مكانى هاتقول ايه, واحد زى الاخ ده اصلا يترد عليه ازاى
يعنى عايزة افهم ماله مستوانا حضرتك..لا والنبى كنت قول .. انا معرفش ليه ماقولتش واسكتفيت بكلمة اكثر استفزازا منك زى بلاش دى
احب اقول ان هو اصلا مش لاقى حاجة يقولها
:واعتقد ان ممكن يكون فى مبررات لكلامه ده زى مثلا
ممكن يكون زعلان من حد فى الكلية, العميدة او اى دكتور عشان كان وعده بحاجة وقاله بالمرة هاتبقى تيجى مثلا مهرجانات التخرج ونفضله ومحدش عبره ولا قاله تعالى
او تقريبا بقى هو زعلان من حمادة امام فقال يضربه فى كلية الجماعة بتاعته
اصل اللى يقرا العمود يلاقيه عمال يتكلم عن الرياضة والاهلى والزمالك وتعاقد الاعب مين والعقوبات اللى اصدرها الاهلى فى مش عارف مين وشوتايم حصلت على الدورى الانجليزى وكلام من ده
يا اما بقى عنده ابن اخته فاشل ودخل كلية اعلام وعمال يسقط فا شاف انه مفيش فايدة منه وراح معمم ان الكلية كلها كده بما ان ابن اخته عمال يديله انطباع عن اصحابه فا الراجل يبقى معذور شاف نوعية ابن اخته فى صحابه فقال الكلمتين دول
طبعا ان مش هاقعد بقى اقوله لا والله يا عمو احنا كويسين ادينا فرصه نثبتلك ان احنا لينا مستقبل اعلامى
عمره ماكان بالكلام يا استاذ هادى, حضرتك اللى هاتشوف المستقبل ده لمين
بس ليا ملحوظة اخيرة
ملكش دعوة بينا الله يكرمك, خليك فى حالك ولا اقولك خليك فى الكورة بتاعتك دى هاتنفعك بلاش تغلط فى حد ممكن يزعلك

هو فى ايه

هو فى ايه

حاسة انى غريبة اوى الفترة اللى فاتت دى

يعنى حاسة انى مش طبيعية

عامة ده نتيجة طبيعية للاحداث اللى عندى

وممكن ماتكنش احداث ذات قيمة يعنى

الا انى يعتبر فى فترة خمول وبالفصحى انتخة

مش بنزل من البيت

بقعد على النت مش بعمل حاجة

الكلام ده من قبل ظهور النتيجة لحد اسبوع كده ولا حاجة

وكل ده فجاة اتغير

بدل ما كنت فى حالة غريبة ومش طبيعية بقيت فى حالة اغرب

يافرحتى

شوفتوا الهنا اللى انا فيه

لا بجد مش عارفة اوصف احساسى

اصل حضارتكم الاسبوع اللى فات ده سافرت

روحت اسكندرية

وما ادراك اسكندرية

يعنى البحر والهوا المنعش والمشى بليل على الكورنييش والقمر والنجوم والصفاء

وانك تبقى مع نفسك؟؟ها مع نفسك؟..وشوف بقى لما تبقى مع نفسك ممكن تعمل ايه

يا دى النيلة ما بلاش انا

ادينى قعدت مع نفسى وكان تقريبا معايا معلقة

قلبت بيها كل الموااااااجع والمفاااااااارح بالمرة

عملت تلخيص مفصل مصغر سريع بسيط موجز مختصر معرفش ازاى

عنى الفترة اللى فاتت

تقريبا كانت حالة فحص حالة بالنسبة ليا

معرفش بقى,, المهم حالة الفحص عدت الحمد لله معرفش بقى على خير ولا على حاجة تاينة

انا حتى الان غير مدركة لاى حاجة

انا حاسة انى مش فى وعيى

والجميل انى نزلت على القاهرة

مش فايقة للحر والخنقة

واتخدت من الدار للنار يعنى من الاجازة نزلت تدريب على طول

مع انى كنت عايزة انزل من البيت باى طريقة بس مش كده

مش من اسكندرية على التدريب

ده حتى الواحد مالحقش يفوق من الحلم اللى كان فيه

عامة كل ده كلام جيه فى بالى حالا,, ومش هو ده اللى كنت عايزة اقوله اصلا

بس قولت فكرة رئيسية انى فى حالة غريبة وده عشان ادخل على موضوع انى مابقتش اتكلم

او اكتب حاجة او اكتب اى بوست

مش لاقية حاجة اقولها,,

وغير كده اللى كتبته لاقيته كئيب اوى

اوى اوى كمان

ماردتش انزله بصراحة لانى انا اكتئبت لما قريته

ليه اكئب بقى غيرى

فا قولت بلاش..

غير كده حاسة انى بقت بلوجر نص كوم

ايوه نص كوم ,, يعنى مبقتش ارد على التعليقات, يبقى كويس اوى انزل بوست ( اى كلمتين مش موضوع محترم) وشكرا على كده

لا برد على حد ولا حتى بعلق عند زمايلى

لدرجة انهم افتكرونى مخصماهم, او بنفض ..والله ابدا

انا بقى هنا حبيت اوضحلهم انى بجد فى حالة غريبة مش عارفة افسرها.. ماليش نفس لاى حاجة.. ويمكن والله ماليش نفس اكتب

حتى الكلام ده قبل ما اسافر

عامة الواحد دلوقتى بقى احسن بعد فترة الاستجمام اللى عملها

وربنا يسهل هحاول بقى اظبط الموضوع ده

عامة ممكن ابقى انشر حاجات كتبتها واكيد هتكون متأخرة بس هاحطها بدل الجفاف اللى بقت فيه المدونة ده

يالا ربنا يسهل

صحيح.. عودا حميدا لى:)