تاجى الثانى

التاج ده ماتفتحش مدونة الا لما تلاقيه.. تاج غريب..سره باتع.. المهم انا طبعا لازم اشكر هدى على تمريره ليا وعشان خاطرك يا ستى جاوبت عليه

من هو:أحب شخص لقلبك فى الدنيا؟

والدى ووالدتى ومحمد وهبه
ورنا اختى الصغيرة اللى بعتبرها بنتى وطبعا طبعا اصحابى ربنا يخليهم ليا

انسان مستعد تضحي بحياتك - ركز فى كلمة حياتك- علشانة؟

حياتى !
ممممم
اهلى طبعا
واى حد يستاهل
وطبعا على حسب الموقف
يعنى ممكن حد معرفهوش واضحى بحياتى عشانه ومش مثالية بس انا عارفة نفسى

اسم أول حب؟

ملكش دعوة

اسم اخر حب(حتى الان)؟

دى بقى ملكش فيه

ما هو :اسم أجمل كتاب كتبه بشر قرأته ومحتفظ به حتى الان ؟

لا مفيش كتاب معين
بس لما بجيب كتاب بحطه فى المكتبة بتاعتى وبقراه كل فترة

اسم كتاب-كتبه بشر برضة- انت متعلق بيه وبتقرأه كل فترة؟

فيه كتاب اسمه كنوز المعرفة ده ممكن اقراه كل لما يقع فى ايدى لان فيه معلومات ماكنتش اعرفها وبيجيب تفسير للحاجات الغريبة فى حياتنا, هو كتاب شيق جدا لانه كل صفحة فيه بيجبلك حاجة مش عارفها
وبحب نوعية الكتب اللى زى دى ..اللى بتقدم معلومات عن حاجات غريبة وجديدة ومش معروفة

شىء تحس بالراحة النفسية عندما تنظر اليه ؟

لما اسرح فى وش طفل رضيع بيبصلى
لما ابص للسما والنجوم وانا على البحربليل
ضحكة والدى ووالدتى ليا وهما راضين عنى
لما بص فى وردة مهداه ليا من حد كنت مستيناها منه
لما شوف فرحة اى حد فى عيونه (وخصوصا صحابى البنات)

مكان تحس فيه بالحنين الى شىء لا تدرى ماهو و ذكريات جارفة الى لاشىء ؟
اماكن كتييير
يعنى مثلا لما بعدى قدام مدرستى الاعدادية (نور الاسلام) بحس بحنين فظيع للايام دى وذكرياتى اللى عمرى ماهنساها
لما بروح بيت جدتى كنت بلعب فى كل ركن فيه وخصوصا الفرندا , وهناك كل شارع بيحمل فيه ذكرى ليا
جنينة الاورمان, برضه بحس بحنين للايام اللى كل العيلة كانت بتجمع فيها وانا كان فىشجرة كل مرة كنت بروح اقعد عندها واتصورت عندها, كل سنة كنت بروح الجنينة لازم اشوف الشجرة
كفاية عليكوا كده

مكان تحس بالراحة عندما تدخله ؟

البيت واوضتى
بحس براحة ما بعدها راحة لما ادخلهم
المسجد
بيت جدتى
واى مكان مفيهوش ناس كتير

اجمل مدينة زرتها داخل مصر ؟

طبعا معشوقتى مرسى مطروح
بحبها حب مش طبيعى
انا كنت بروحها كل سنة بقعد فيها ال3 شهور الصيف كنت بشتغل مع والدى هناك
لافيتها كلها.. يمكن البحر ماكنتش بنزله اصلا خلال ال3 شهور غير اسبوع ولا حاجه بس كان لازم كل يوم انزل اتمشى على البحر لوحدى

أجمل مكان طبيعي رأيته داخل مصر؟

بصراحة بحر مطروح وكل مكان فيها والا ماكنتش حبتها الحب ده كله

اهم جهاز منزلى انت متعلق بيه او بتستخدمه كتير ؟

اكيد الكومبيوتر

نوع هاتفك المحمول؟

ما انت كنت ماشى كويس, نوكيا 1110

سرعة بروسيسور جهازك ؟

2.6 جيجا هرتز

حجم ذاكرة –هارد- جهازك ؟

80 جيجا بايت

المساحة التى تشغلها المواد الاسلامية على جهازك ؟

مساحة كويسة الحمد لله واتمنى انى ازودها اكتر

نفس المساحة السالف ذكرها فى قلبك-الاجابة لنفسك عشان الرياء يا اخواننا ؟

طيب عامة هى نفس الاجابة السالف ذكرها

أهم هدف انت واضعه لحياتك دلوقتى ؟

انى اخد خبرة دلوقتى فى مجال الصحافة
واطور نفسى فى التصوير واتعلم كل حاجة متعلقة بيه من فوتوشوب وتدريب وحتى لو وصل الامر لدراسة اكاديمية للتصوير واشتغل حاجة تدعم ده اطور من نفسى فى اللغة وطبعا

مواصفات فتاة –أو فتى للبنات- الأحلام بالنسبة لك؟
اولا برفض مسمى فتى الاحلام ده
لانى مؤمنة انه فتى الواقع ..يعنى مش هايفضل فى احلامى كتير انا مستيناه حقيقة اعيشها
ثانيا انا ماليش مواصفات لانى واثقة ان النصيب لما بيجى كل الاحلام الخرافية دى مش هايبقى ليها وجود اصلا
وانا من النوع انى ممكن اتقبل اى حد مهما كانت صفاته واستحمل فيه الصفات حتى الغير مرغوبة بس عشان اريحك هاقول صفات المفروض اساسية هو اكيد لازم يكون ملتزم اخلاقيا ودينيا
اهم بقى حاجتين انه يحبنى جدا ويتقى الله فيا
الى جانب ان مش لازم نكون انا وهو متفقين, يعنى ممكن يكون مختلف تماما عنى بس الاهم نكون متفقين على الاختلاف ده
وطبعا كل حاجه ليها حدود يعنى الاختلاف المقبول
حاجة كمان صحيح, اكون كل حاجة بالنسبة ليه ..لان اقل حاجة انا هاقدمهاله انه هايكون كل دنيتى

صف ما يأتى :شعورك لما بتسمع كلمة مصر؟

عادى جدا..شعور اى واحد بيحب بلده
بفتخر بانى منها
وبحس انى عايزة اعمل حاجات كتير عشانها برغم ظروفها, ويمكن عشان ظروفها دى اصلا

شعورك لما بتسمع كلام عن اليهود ؟

مش عارفة
يعنى لو كنت سئلتنى السؤال ده من 5 شهور مثلا كنت هاقولك قلق وتوتر وبضايق من سيرتهم
لكن دلوقتى محتارة جدا لانى قابلت يهود ومحستش بكل ده وقعدت واتكلمت معاهم..فى الاول قلبى اتقبض لما عرفت انهم يهود وبعدها عادى اتكلمت معاهم
بس ده لا يمنع انى لما بسمع اسرئيلى بتجننهافضل اكرههم حتى لو مفيش سبب حتى لو التاريخ محى كل حاجة عن ماضيهم الاسود ويمكن كرهى متمثل لاى صفة بتكون فيهم: زى الخيانة والكذب وانتهاك حقوق الغير وتشويه الحقيقة ..وكل اللى نفسك فيه

شعورك لما بتشوف ظابط شرطة ؟

والله على حسب المكان اللى بشوفه فيه وعلى حسب الموقف
يعنى مثلا لما بشوف ظابط فى مظاهرة وواقف مترقب لاى واحد عشان ياخده بحس بالاشمئزاز من ناحيته
ظابط واقف مثلا فى دورية بليل او حراسة او بيقوم بوظيفته عادى اللى هى الامن مش بخاف منهم
اصل كل مكان فيه الكويس وفيه الوحش
بس للاسف فيه اماكن الوحش لما بيظهر بيبقى وحش اووى خصوصا لو فيه سلطة ونفوذ
وبيبقى فيه فساد جامد
وده على لسان ظابط نفسه يعنى مش كلامى انا بس

شعورك لما بتشوف الكناس العجوز فى الطريق ؟

بضايق عشانه
عشان مش عايش زينا
وبتعلم منه
الرضا على وشه والابتسامة
اللى بتختفى من وشوش ناس عايشين احسن منه

لون البطانية اللى بتتغطى بيها فى الشتاء ؟

نعم!!فوحلوقى..فرقت يعنى

لون الجورب-الشراب- المفضل لديك ؟

ايه يا عم ,, شراب ايه.. عيب كده

احساسك اذا داست قدمك فى الطريق على مخلفات اخراج حيوان- *** ولا مؤاخذة؟

بص انا حاسة ان السؤال غريب ومش فى مكانه بس فيه معنى وراه ..عامة
بحس باحساس مريع وببص بقرف لرجلى وبحاول امسحها فى الارض وبكمل مشي
(زى بتاع الكبدة يا عمرو):D
ماهو لازم امشى يعنى مش هاقف, كتير الواحد بيقابل حاجات مش كويسة فى طريقه غصب عنه هايخدعه بصره وبصيرته فى مرة, ويمشى عليها رغم محاولته كل مرة انه يتجنبها بس لو تعثر فيها عادى ينظف رجليه ويكمل مشى

افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف ؟

برضه على حسب
فى ناس بحس براحة لما بشوفهم بقول ماشاء الله ربنا يكرمه
وفعلا شكلهم بيشرح القلب
(لسه امبارح والله شوفت واحد كده ومعاه واحدة منقبة ومسكها وخايف عليها بجد فرحت لما شوفتهم ودعيتلهم ان ربنا يكرمهم)
وناس تاينة بيبصولى شظرا كده وبطريقة غريبة ويستغفروا ربنا ويستعيذوا من الشيطان ويتعمدوا يسمعونى صوتهم
طبعا دول بيسيبوا انطباع عندى مش حلو
بس بقول ربنا يهديهم ويعرفوا ان الدين معاملة

احساس يراودك فى اشارة مرور مغلقة بسبب مسئول كبير؟

بص بمسئول او من غير هى بتبقى واقفة خلقة بس لما بكون مستعجلة اكيد بتخنق
وطبعا المسئول ده بياخد اللى فى النصيب من الدعا عليه
فى العادى بقى بقعد اتفرج على تعبيرات الناس من الموقف
وطبعا بتشوف حاجات ربنا مايورهالك الناس مقهورة ومتاخرة
فا بالتالى برضه برجع ادعى تانى على الاخ المسئول
يالا عشان يحرم يوقفنا فى اشارة تانى

بمرر التاج ل عمرو , مروة، واللى عايزه مايغلاش عليه